"5 aı jalaqy tólenbegen". Depýtat Asqar Mamınge saýal joldady

Depýtat Názılá Razzaqbaıqyzy aılyq jalaqynyń tólenbeýine qatysty úkimet basshysy Asqar Mamınge saýal joldady.

– Qazirgi ýaqytta eńbek quqyqtarynyń buzylýyna, sonyń ishinde aılyq jalaqynyń tólenbeýine baılanysty shaǵymdar kóp. Mysaly, "Atyraýstroıproekt" jaýapkershiligi shekteýli seriktestiginiń jumysshylaryna bes aı boıy jalaqy tólenbegen. Osyǵan baılanysty ujymdyq shaǵymǵa Atyraý oblysynyń eńbek ınspeksııasy tıisti tekserý júrgizýdiń múmkin emestigin aıtyp, jaýap bergen. Oǵan sebep retinde prezıdenttiń 2020 jylǵy 1-shi qańtardan bastap shaǵyn jáne mıkrokásipkerlik sýbektilerine tekserý, profılaktıkalyq baqylaý jáne qadaǵalaý júrgizýge, sondaı-aq, pandemııaǵa qarsy shekteý sharalaryna baılanysty moratorıı engizý týraly jarlyǵyn alǵa tartyp otyr.

Qyzylorda oblysynda da dál osyndaı jaǵdaı. Atalǵan oblystyń eńbek ınspeksııasy da qoldanystaǵy moratorııge baılanysty “Badı-Nur KZ” mekemesinde jumys isteıtin 20-dan astam azamattyń ujymdyq ótinishi boıynsha tekserý júrgizýden bas tartqan. Olarǵa 4 aı jalaqy tólenbegen.

Alaıda, Jarlyqqa sáıkes, halyqtyń ómiri men densaýlyǵyna, zańdylyqtar men qoǵamdyq tártipke qaýip tóndirýi múmkin jaǵdaılardyń aldyn alýǵa nemese joıýǵa baǵyttalǵan tekserýler júrgizýge bolady.
Ol ortalyq memlekettik nemese jergilikti atqarýshy organnyń birinshi basshysynyń sheshimi negizinde qolǵa alynady, – dedi Názılá Razzaqbaıqyzy.

Sondyqtan, depýtat eń aldymen, Eńbek ujymdarynda áleýmettik turaqtylyqty qamtamasyz etýdiń mańyzdylyǵyn jáne jumyskerlerdiń eldiń Konstıtýsııasy men zańdarynda kepildik berilgen eńbek quqyqtaryn saqtaý boıynsha naqty sharalar qabyldaýdy atap aıtty.