"О́limge kim jaýapty?". Depýtattar Jańatastaǵy qaıǵyly oqıǵaǵa qatysty málimdeme jasady

Májilis depýtaty Fahreddın Qarataev úkimet basshysy Asqar Mamınge Jambyl, Qyzylorda oblystarynda jáne Petropavl qalasynda bolǵan qaıǵyly oqıǵalarǵa qatysty depýtattyq saýal joldady.

– "Tas túsken jerine aýyr" demekshi, bul – barsha qazaqstandyqtyń qaıǵysy. О́rt saldarynan jazyqsyz nárestelerinen jáne azamattarynan aıyrylyp qalǵan jaqyndaryna depýtattar atynan qaıǵyryp kóńil aıtamyz. "Jazsyqsyz shetinegen balalarymyz ben azamattarymyzdyń qaýipsizdigi úshin kim jaýapty?" degen suraq barshamyzdy oılandyrady. Osy oqıǵa tıisti jergilikti atqarýshy organdarǵa úlken sabaq bolýy qajet. Bizdiń turǵyndarymyz qashanǵy ottyń astynda qala berýi kerek? Balalardyń ólimi úshin kim jaýapty? Erteńgi kúni bundaı jaǵdaılarǵa tap bolmaýymyzǵa kim kepil? – dedi Fahreddın Qarataev.

Depýtattyń aıtýynsha, bul oqıǵalar elde túbegeıli sheshýdi talap etetin máseleler kóp ekenin kórsetken. Byltyr tıisti ókilettiktermen jáne kadrlarmen qamtamasyz etilgen Tótenshe jaǵdaılar mınıstrligi qaıta qurylǵan. Alaıda onyń atqarǵan jumysy árdaıym ýaqytyly jáne tıimdi bola bermeıdi.

– 2020 jyldyń toǵyz aıynda elimizde 9000-nan astam órt boldy, 228 adam qaza tapty, jaraqat alǵandar – 217 adam. Tótenshe jaǵdaılar mınıstrligi qys maýsymyna daıyndyq jumystary júrip jatqandyǵy týraly málimdedi. Olardyń málimetteri boıynsha, jumystardyń barlyǵy aıaqtalyp, kemshilikterdi joıý týraly nusqaýlar berilgen. Alaıda, oryn alyp otyrǵan qaıǵyly oqıǵalar istelip jatqan profılaktıkalyq jumystyń jetkiliksiz ekendigin kórsetti, – deıdi depýtat.

Osyǵan baılanysty depýtattar Jańatas, Qyzylorda jáne Petropavldaǵy oqıǵalarǵa qatysty júrgizilgen tergeý nátıjeleri boıynsha kináli laýazymdy tulǵalarǵa eń qatań sharalar qabyldap jáne bul týraly buqaralyq aqparat quraldaryna aqparat berýdi jáne osyndaı jaǵdaılardyń aldyn-alyp erekshe baqylaýǵa  alýdy surady.

Sondaı-aq tótenshe jaǵdaılar mınıstrlik jergilikti ákimdiktermen birlesip, profılaktıkalyq jumystardy, órt  qaýipsizdigin baqylaý jáne aldyn alý sharalardy kúsheıtý jónindegi júıeli jumys júrgizýdi usynamyn.