"Ústi-basy bylǵandy". Almatylyqtar ákim orynbasaryn batpaqtyń ústimen júrgizdi

Úsh jyldan beri balshyq keship júrgen Alǵabas aýylynyń turǵyndary ákimniń otstavkaǵa ketýin talap etti, dep habarlady KTK arnasy.

Aýyl turǵyndarynyń aıtýynsha, Alǵabas aýyly qala aýmaǵyna kirgen kezde sý qubyryn júrgizý jumysy bastalǵan. Sol úsh jyldan beri aıaqtalmaı, qazir kóshedegi batpaqtan aıaq alyp júrý múmkin emes.

Turǵyndar aýdan ákimin laıdyń ortasyna shaqyrǵanymen, orynbasary ǵana kelgen. 

– Júrý múmkin emes! Mine, aıaǵymyz, túrimiz! Kúnde jumysqa baryp  qaıtýdyń ózi qıyn bop ketti! Ne sumdyq! Shydamnyń da shegi bar! Biz ne isteýimiz kerek, qarapaıym halyq?! – dedi aýyl turǵyny Serikqazy Rahmatýlla.

Turǵyndardyń aıtýynsha, halyq talaı márte ákimdikke shaǵymdanyp barǵan. Alaıda ákim ýádesinde turmaǵan.

Alataý aýdany ákiminiń orynbasary Bektas Sábıtovtiń aıtýynsha, qarajatty ákimdik emes, energotıimdilik basqarmasy bóledi.

– Tapsyrys berýshi osy energotıimdilik basqarmasy. Qarajatty Alataý aýdany ákimdigi emes, osy basqarma bóledi. Men sondyqtan osy quzyrly mekemeni shaqyrdym. Quzyrly mekeme jaýap bersin dep aıtyp otyrmyn, – dedi ol.

Ákimdiktegilerdiń aıtýlarynsha, qubyrdy salǵan boıda joldy tegistetipti. Sondaı-aq birqatar kóshege adamdar júretin ýaqytsha jol, trotýar jasap qoıǵanyn aıtty.

Ashýǵa býlyqqan alǵabastyqtar sheneýnikti merdiger kompanııanyń basshysymen birge batpaqtyń ústimen júrgizdi. 

Ústi-basy bylǵanǵan ákim orynbasary aqyry turǵyndardan qashyp tyndy. Al qubyr salýǵa tapsyrys bergen basqarma ókilderi naýryz aıynyń sońyna deıin asfalt salýdy bastaýǵa ýáde berdi.