Semeı qalasynyń turǵyny Olga Karasheva kúıeýi Rýslan Karashevtiń qazasyna polıseılerdiń qatysy bar degen pikirde. Jábirlenýshiniń kúıeýi 2020 jylǵy 11 qarashada qaıtys bolǵan. Onyń denesi turǵynúı aýlalarynyń birinen tabylǵan. Denede kóptegen soqqy izderi bolǵan. Áıeldiń aıtýynsha, ol izder dýbınkamen urǵannan qalǵan. Resmı aqparatta er adam shamadan tys esirtki qoldanǵannan qaıtys bolǵany aıtylady. Teksergende de oń qolynan ıne izderi anyqtalǵan, dep habarlady arnapress.kz saıty. 

– Kúıeýimdi óltirip ketkenine 100 paıyzǵa senimdimin. Tipti, soqqy izderi, jaraqattyń kólemi, qoldaǵy kógergen tustardyń bári polısııa qyzmetkerleriniń dýbınkamen "jumysyna" uqsaıtynyn ekspertıza kórsetip otyr. Biz júgingen advokattar da osylaı deıdi. О́ıtkeni bilek, qol, qoltyqtyń asty qantalap turdy. Búırekten urǵan. Ishten eki ret urǵan. Syrtynda jaraqat izderi baıqalmaǵanymen, máıitti ashý kezinde eki jerdiń jyrtylǵany anyqtaldy, – deıdi áıel.

Adam ólimine sebep bola alatyn osyndaı aıqyn belgilerge qaramastan, resmı derekte "ólimge esirtkini artyq dozada qoldaný sebep" delingen. Olga Karasheva polıseıler osy arqyly "qylmystyń izin jasyrǵysy" keledi dep sanaıdy.

– Sol kúni (11 qarasha) polısııa qyzmetkerleri kelgende kúıeýimniń barsetkasy men telefonyn berdi. Barsetkaǵa balshyq juqqan. Ony óltirip ketkenin birden bildim. Olar "ol nashaqor bolatyn, asqyn dozırovkadan qaıtys boldy" dep aıtty. Men ant etep, ol eshqanshan ınege otyrǵan emes. Olar eshteńe "tyńdaǵymyz kelmeıdi, qaǵazdarǵa qol qoıyp ber, sonymen bitti" dedi, – deıdi jesir áıel.

Ine er adamnyń oń jaq shyntaǵyna salynǵany da áıeldiń kúdigin qoıýlata túsken. Olga Karashevanyń aıtýynsha, kúıeýi solaqaı bolmaǵan. Sondyqtan ol óz betinshe oń qolyna ıneksııa jasaýy múmkin emes. Al quzyrly organdar "Rýslan Karashev ıneni ózine-ózi saldy" deıdi. 

Jábirlenýshi polıseıler kúıeýi týraly minezdemeni jumysynan ne kórshilerden emes, nashaqorlardan alǵanyna ashynady.

Sondaı-aq Olga Karasheva sotmedeksperttiń tergeýshimen "ólim qatty zatpen urǵannan, jyrtylý men ishten qan ketýden boldy" degenin estigenin jetkizdi. Artynsha ekspert jábirlenýshiniń ózine "mundaı jaraqatpen bir saǵattan artyq ómir súre almaıtyn edi" dep málimdegen.

Áıeldiń aıtýynsha, kúıeýi ólgennen keıin polısııa qyzmetkerleri onyń esepshotynan Kaspi qosymshasy arqyly 120 myń teńge sheship alǵan.

– Polıseıler telefondy maǵan 20 saǵat 05-07 mınýtta qaıtaryp berdi. Al 20:02-de shottan aqsha sheshilgen. Muny polıseıler ǵana isteı alady. Olar bes adam bolǵan:tórteýi aqshany 30 myń teńgeden bólip alǵanyn moıyndady, – degen áıel tergeý úshin kúıeýiniń qabirin ashýǵa ázir ekenin jetkizdi.

Atalǵan is boıynsha qylmystyq is tek bir aıdan keıin 9 jeltoqsanda qozǵalǵan. Bastapqyda "abaısyzda bolǵan kisi ólimi" boıynsha qozǵalǵan is jábirlenýshiniń aryz-shaǵymynan keıin "kisi óltirý" babyna aýystyrylǵan.

"Qamshy" silteıdi
Ilmek sózder: kisi ólimi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir