Ilon Mask ıadrolyq qarýmen Marsty bombalaıtynyn aıtty

Marsta qala salýdy masqat etip, 2050 jylǵa deıin bir mıllıon adamdy Qyzyl ǵalamsharǵa alyp ketetinin málimdegen mıllıarder Ilon Mask Marsty on jylda Jershary sııaqty ǵalamsharǵa aınaldyratynyn aıtty. Tesla jáne SpaceX kompanııalarynyń bas atqarýshy dırektorynyń aıtýynsha, Marsty adamzat ómir súre alatyndaı ǵalamsharǵa ózgertýdiń eki túrli joly bar.

Bir qyzyǵy, Mask Marsty tezirek ózgertý úshin Qyzyl ǵalamsharǵa myńdaǵan ıadrolyq qarýdy jarý týraly qaıtalap aıtyp júr. 

Bul týraly mıllıarder alǵash ret 2015 jyly "Stefan Kolbertpen keshki shoý" baǵdarlamasynda bolǵan kezde málimdedi.

Keshki shoýda Mask Qyzyl ǵalamshardy adamdar ómir súrýge yńǵaıly etip ózgertýge bolatynyn atap ótti jáne onyń eki túrli jolyn aıtty:

– Birinshi joly, siz (Marsta) móldir kúmbezderde ómir súrýińiz kerek, biraq aqyr sońynda siz Marsty Jerge uqsas planetaǵa aınaldyra alasyz. Siz ony (ǵalamshardy) jylyta alasyz. Marsty jyly etý tez nemese baıaý bolýy múmkin. Baıaý jolynda biz parnıktik gazdardy Mars atmoferasyna jiberemiz, – dep qosty Mask.

"Jyldam jol?" dep suraǵan Stefan Kolbertke: 

– Termoıadrolyq qarýdy Marstyń polıýsterine jarý, – dep jaýap berdi. 

Mask bul oıyn birneshe ret málimdedi. 

Ol 2019 jyly 15 tamyzda óziniń súıikti áleýmettik jelisi Twitter-de "Marsty ıadrolyq bombalaý!" dep taǵy jarııalady. 

Masktyń pikirinshe, Qyzyl ǵalamshardy ıadrolyq qarýmen bombalaýdyń nátıjesinde Marstyń polıarlyq muz qabattary erip, kómirqyshqyl gazy kóp mólsherde atmosferaǵa shyǵarylýy múmkin. Bul ǵalamshardyń temperatýrasy men aýa qysymyn kóteretin parnıktik effekt týdyrýy yqtımal. Bul Marstyń klımatyn ózgetýdiń jyldam nusqasy. 

Mask 2019 jyly 18 tamyzda taǵy bir jazba jarııalap, Qyzyl ǵalamshardy adam ómir súrýge qolaıly etýdiń jańa teorııasyn alǵa tartty. "Marsty jylytý úshin jaryq shaǵylystyratyn myńdaǵan jasandy serikter nemese jasandy Kúnder kerek bolýy múmkin" dep jazdy.

Mıllıarder bul oıyn 2020 jyly da jarııalady. 

2020 jyly 13 mamyrda Roskosmostyń atqarýshy dırektory Aleksandr Bloshenko Twitter paraqshasynda "Búgingi kúnniń taqyryby: «Ilon Maskqa Marsty bombalaý úshin 10 myńnan astam zymyran qajet –Roskosmos» dep jazba jarııalady. Al, Mask Twitter-de oǵan jaýap berip, "Problema joq" dep jazdy. 

Marsta qala salyp, "Starship" dep atalatyn juldyzkememen Jersharydan bir mıllıon adamdy alyp ketpek bolǵan mıllıarder Qyzyl ǵalamsharda ǵarysh kemelerine arnalǵan 1000 ushyrý alańy bolatynyn málimdedi. Aqparatqa sáıkes, qazirge deıingi eń iri ǵarysh kemesi esepteletin "Starship" juldyzkemesi 100 adamdy alyp usha alady.