Foto: Polisia.kz
Eki kún dalalyqta joǵalyp ketken jasóspirimdi polıseı atpen izdep taýyp alǵan, dep habarlady Polisia.kz saıty.
Saıt málimetinshe, 16 aqpanda Qaraǵandy oblysy Jańaarqa aýdanynyń polısııa bólimine 14 aqpanda qystaqtardyń birinen 16 jastaǵy jasóspirimniń shyǵyp ketip, qaıtyp oralmaǵany týraly habarlama túsken. Atalǵan aqparat túsken sátten bastap polısııa qyzmetkerleri jedel-izdestirý is-sharalaryn uıymdastyryp, balany izdegen.
Buǵan deıin balanyń ata-anasy eki kún boıy ózderi izdegenimen, taba almaǵan.
Izdeý sharasyna Jańaarqa aýdany Bıdaıyq kentiniń ýchaskelik polısııa ınspektory Jubanysh Júnisbekov te qatysqan.
Ýchaskelik polıseıdiń aıtýynsha, izdeýshiler avtokóliktermen attanǵan. Al ol óziniń serigi - polısııa qyzmetkeri Kamı Ýskenbaev ekeýi atpen izdeýge shyqqan.
– Atpen júrip, atymen aıǵaılap shaqyrdyq. Biz óz jańǵyryǵymyzdy estip júrgendikten, qıyn boldy. Serigimiz ekeýmiz árbir tasty, shómeleni zerttedik, balany baıqamaı qalmaıtynymyzǵa senimdi bolýymyz kerek edi. Kesh batyp kele jatty, kún batqannan keıin munda izdeý múmkin emes bolatyn. Baılanys bolǵan joq, baǵdarymyzdan jańyldyq. Alaıda biz qarańǵy batqansha, izdeýdi jalǵastyra berdik. Tastarmen júrý attarǵa qıyn boldy. Biz attan túsip, kezdesken shómeleni tekserýge bardyq. Sol jerde biz onyń kúrteshesin kórdik, – dedi ýchaskelik polıseı.
Ol jaqyndap kelip qaraǵanda, balanyń tiri ekenin baıqaǵan. Jasóspirim yzǵarly jelden yqtasyn izdep, jerde tastardyń arasynda jatqan.
Onyń aıtýynsha, bastapqyda jasóspirim shok kúıde bolǵan. Polıseılerge ań-tań bolyp qarap, olardy gallıýsınasııa eken dep oılaǵan.
Jasóspirim dalalyqta adasyp qalyp, qaıtar joldy uzaq izdegen. Túnde sharshaǵandyqtan, ári tońǵandyqtan shómelege kirip jylynbaqshy bolǵan. Alaıda oǵan jan-jaqtyń bárinen qasqyrdyń ulyǵany estilip turǵan.
Jasóspirim esin jıǵannan keıin jylap, polıseılerge raqmetin aıtqan.
Ýchaskelik polıseı Jubanysh Júnisbekov polısııada 2009 jyldan beri qyzmet atqarady.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir