Turmystyq zorlyq-zombylyq zańyna qarsy advokat buryn eki qyzdy zorlaǵany úshin sottalǵan

Turmystyq zorlyq-zombylyq týraly zań jobasyna qarsy belsendilerdiń biri advokat, zańger Madııar Áljapparov buryn kámeletke tolmaǵan balany zorlaǵany úshin sottalǵany týraly aqparat tarady. Bul týraly baigenews.kz saıty habarlady.

Saıt málimetinshe, birneshe telegram arna men facebook-te jarııalanǵan aqparattarda balalar men áıelderdi qorǵaýǵa arnalǵan zań jobasyna belsendi túrde qarsy shyqqan Áljapparov 2010 jyly kámeletke tolmaǵan balany zorlaǵany úshin sottalyp, jeti jylǵa bas bostandyǵynan aıyrylǵany týraly aqparat taraǵan.

– Jaqynda Qazaqstannyń dástúrin, mádenıeti men táýelsizdigin saqtaý jolynda júrgen Anatolıı Kım instagram paraqshasynda madiyar_advokat syılaǵan qazaq qamshysynyń sýretin saldy. Alaıda ol turmystyq zorlyq-zombylyq týraly zańǵa qarsy bolyp júrgen "Madııar-advokat" eki ret zorlaý deregimen sottalǵan burynǵy quqyq qorǵaý qyzmetkeri ekenin aıtýdy umytyp ketipti. "Advokattyń" qurbandarynyń biri kámelet jasyna da tolmaǵan.

Ol eshqandaı advokat emes. Instagram áleýmettik jelisinde vaksına, maska jáne zorlaýshylarmen kúreste "aǵa-ápkeleriniń" kómegimen oqyrman jınaǵan qarapaıym zańger, –  dep jazdy "Veter levogo berega" Telegram arnasy.

Nur-Sultan qalalyq soty Madııar Áljapparov zorlaý jáne kisi óltirý qaýpimen baılanysty zorlyq-zombylyq áreketteri úshin sottalǵanyn rastady.

– 22.07.1977 jyly týǵan Áljapparov Madııar Aımýrzauly 2010 jyldyń 21 shildesinde Nur-Sultan qalasynyń kámeletke tolmaǵandardyń isteri jónindegi mamandandyrylǵan aýdanaralyq sotynda bas bostandyǵynan aıyryldy. Oǵan qylmystyq kodekstiń 120-baby 2-bóligi jáne 121-baby 2-bóliginiń "b", "g", "d" tarmaǵynyń zorlaý jáne nápsiqumarlyq sıpattaǵy zorlyq-zombylyq áreketteri úshin 7 jylǵa bas bostandyǵynan aıryldy, – dep habarlady qalalyq sottyń baspasóz qyzmeti.