Aımaǵambetov vedomstvosy taǵy bir jeke ýnıversıtettiń esigine qulyp saldy

Bilim jáne ǵylym mınıstrligi sapasyz bilim beretin joǵary oqý oryndarynyń sanyn qysqartý boıynsha jumysty jalǵastyryp jatyr.  Barlyq tekserý qatań túrde qoldanystaǵy zańnamaǵa sáıkes júzege asyrylýda. Talaptar boıynsha joǵary oqý oryndary anyqtalǵan buzýshylyqtardy berilgen ýaqyt ishinde joıýǵa tıis. Bul týraly mınıstrliktiń baspasóz qyzmeti.

Máselen, ótken jyly Bilim jáne ǵylym salasyndaǵy sapany qamtamasyz etý komıteti Qazaq medısınalyq úzdiksiz bilim berý ýnıversıtetiniń bilim berý qyzmetine tekserý júrgizip, nátıjesinde óreskel buzýshylyqtar anyqtady.

Atap aıtqanda, joǵary oqý ornyndaǵy bakalavrıat, magıstratýra, doktorantýra, rezıdentýra baǵdarlamasy boıynsha oqý úrdisi qajetti professorlyq-oqytýshylyq qurammen jáne tıisti materıaldyq-tehnıkalyq bazamen qamtamasyz etilmegen. Sonymen qatar oqý ornyndaǵy ózge de mańyzdy kórsetkishter belgilengen eń tómengi normalarǵa sáıkes kelmeıdi.

2020 jylǵy shilde aıyndaǵy tekseris nátıjeleri boıynsha atalǵan ýnıversıtet lısenzııasynyń kúshi toqtatylyp, anyqtalǵan buzýshylyqtardy joıýǵa ýaqyt berilgen. Alaıda, qaıta tekseris júrgizý kezinde Qazaq medısınalyq úzdiksiz bilim berý ýnıversıteti Komıtettiń nusqamalaryn oryndamaǵany jáne zańnamany óreskel buza otyryp, jumysyn jalǵastyrǵany belgili boldy.

– Bolashaq dárigerlerge sapaly bilim berý – adamdardyń ómiri men densaýlyǵynyń kepili. Osy oraıda biz sotqa júginýge májbúr boldyq. Qazaq medısınalyq úzdiksiz bilim berý ýnıversıtetin jabý máselesin sot ta, Bilim jáne ǵylym mınıstrliginiń Komıteti te qarady. Almaty qalasynyń mamandandyrylǵan aýdanaralyq ákimshilik sotynyń qaýlysyna sáıkes Qazaq medısınalyq úzdiksiz bilim berý ýnıversıteti ákimshilik jaýapkershilikke tartyldy. Odan bólek, JOO-ǵa aıyppul salynyp, bas lısenzııadan aıyrý týraly sheshim shyǵaryldy, – dedi Bilim jáne ǵylym salasynda sapany qamtamasyz etý komıtetiniń tóraıymy Gúlzat Kóbenova.

Qazaq medısınalyq úzdiksiz bilim berý ýnıversıteti Almatydaǵy dárigerlerdiń biliktiligin jetildirý uıymynyń bazasynda 2015 jyly qurylǵan. Búgingi tańda atalǵan oqý ornynda 3 myńnan astam stýdent oqıdy.

Mınıstrlik lısenzııasy tartyp alynǵan oqý ornynda oqıtyn stýdentterdiń granttary saqtalatynyn jáne olar basqa joǵary oqý oryndaryna aýystyrylatynyn habarlady. Sondaı-aq oqý quny ózgermeıtinin, oqytýshylardy jumysqa ornalastyrý máselesi jeke qarastyrylyp jatqanyn jetkizdi.