Mamın kimderdiń jalaqysy 330 myń teńgeden asatynyn aıtty

Premer-mınıstr Asqar Mamın 2023 jylǵa qaraı pedagogterdiń aılyǵy eki ese ósetinin málimdedi. Bul týraly úkimet basshysy Nur Otan fraksııasynyń keńeıtilgen otyrysynda aıtty.

– Pedagogterdiń jalaqysy 2023 jylǵa qaraı 2 ese, 330 myń teńgeden asady. Ortasha jalaqy jyl saıyn keminde 25 paıyz ósedi. 2023 jylǵa qaraı bilim berý júıesi bilikti muǵalimdermen 100 paıyz qamtylady, – dedi Mamın.

Sondaı-aq úkimet basshysy 3-6 jas aralyǵyndaǵy balalar mektepke deıingi tárbıemen jáne oqytýmen tolyq qamtylatynyn atap ótti.

– Apatty jáne úsh aýysymdy mektepter máselesin tolyq sheshý úshin 800 mektep salynady. Bıyl 200 jańa mektep paıdalanýǵa beriledi. 2025 jyly aýyl mektepteri ınternetke qosylady, sondaı-aq kompıýterlermen jáne oqý prosesin uıymdastyrýǵa qajet basqa jabdyqtarmen qamtamasyz etiledi, – dedi premer-mınıstr.