"Aqtalýdan aýlaqpyn". Rınat Zaıytov málimdeme jasady

Alataý dástúrli óner teatryna basshylyq qyzmetke taǵaıyndalǵan aıtysker aqyn Rınat Zaıytov ózin quttyqtap jatqandarǵa alǵys bildire otyryp, bul qyzmetti ózine artylǵan jaýapkershilik dep túsinetinin jetkizdi.

"Jalǵan sóılep, aqtalýdan aýlaqpyn. Degenmen de qaıda baryp, ne istesem de barlyǵy áýeli Jaratýshy, sonan soń ómirlik tilekshim, saqtaýshym, janashyrym da Halyq bolǵandyqtan bir aýyz túsindirip óteıin. Adam bir nársege qabiletti ekenin kórsetpeıinshe, eshkimge eshteńeni qur sózben dáleldeı almaıtyny aıdan anyq. Sondyqtan maǵan berilgen bul múmkindik birinshi kezekte ózime synaq. Úsh júzge sóılep júrgen aqyndaryńyz eki júz adamdy jumyldyryp jumys istete almasa, onyń paıdasy ne? Osy sózben kelisetin shyǵarsyzdar? О́mirdegi eń úlken tilegim óz elimniń bir buryshynda qazaq ónerine adal qyzmet etý ǵana. Ony talaı jerde aıtyp ta júrdim. Mine sol tilegimniń alǵashqy kúni búgin ótti. Quttyqtaý artyq. Sáttilik tileseńizder, alǵysym sheksiz. Almaty qalasynyń mádenıet basqarmasynyń basshylyǵyna senim bildirgenine kóp rahmet. Ázirge osylaı" delingen Rınat Zaıytovtyń jelidegi jazbasynda.