Saılaýdan keıin: Nur Otan 569 kókeıkesti máseleni baqylaýǵa aldy

«Nur Otan» partııasy saılaýdan keıingi bir aı ishinde partııalyq baqylaý komıssııasynyń 233 otyrysyn ótkizip, onda 569 másele qaraldy. Atap aıtqanda, jalaqynyń ýaqtyly tólenbeýi sýdyń joqtyǵy, jylytý jáne kóshelerdi jaryqtandyrýǵa qatysty shaǵymdar, jaıaý júrginshi ótkeli men pandýstar salý týraly usynystar jáne taǵy da basqa máseleler bar.

«Nur Otan» partııasy baspasóz qyzmetiniń málimetinshe, atalǵan jumys Elbasy, partııa lıderi Nursultan Nazarbaevtyń tapsyrmasyna jáne Memleket basshysy Qasym-Jomart Toqaevtyń «Halyq únine qulaq asatyn memleket» tujyrymdamasyna sáıkes júrgizilýde.

Máselen, Aqtaýda «Nur Otan» Partııalyq baqylaý komıssııasy qala turǵyndarynyń jaıaý júrginshiler ótkelin jaryqtandyrýǵa qatysty ótinishterin tekserdi. Tekserý barysynda 183 ótkeldiń tek 8-i ǵana jaryqtandyrylǵany anyqtaldy. Aqtaý qalasy ákiminiń orynbasary E.Izbergenov pen qalalyq kólik jáne avtomobıl joldary bóliminiń basshysy J.Qubashev tártiptik jaýapkershilikke tartyldy. Qala ákimdigine 2021 jyldyń 1 shildesine deıin 175 jaıaý júrginshiler ótkelin jaryqtandyrý jumystaryn aıaqtaý usynyldy. Qazirgi ýaqytta jaıaý júrginshiler ótkeline jaryq ornatý jumystary bastalyp ta ketti.

Pavlodar oblysynyń Aqsý qalasynda «Nur Otan» partııasynyń ókilderi az qamtylǵan kópbalaly otbasylarǵa arnap salynǵan úılerdi qarap shyqty. Tekserý qorytyndysy boıynsha 27 úıdiń birinde aqaý bary anyqtaldy. Qala ákimdigine aqpan aıynyń sońyna deıin atalǵan turǵyn úıge kúrdeli jóndeý júrgizý usynyldy.

Almaty qalasynda Partııalyq baqylaý komıssııasy «Afına Pallada» JShS qyzmetkerleriniń jalaqysyn ýaqytyly ala almaýyna qatysty shaǵymy boıynsha tekserý júrgizdi. Tekserý barysynda 2020 jyldyń qyrkúıeginen bastap seriktestiktiń qyzmetkerler aldyndaǵy qaryzy 25 mln teńgeden asatyny anyqtaldy. Bul máselege partııa aralasqannan keıin jumysshylar aldyndaǵy qaryz tolyq óteldi.

Almaty oblysynda Eńbekshiqazaq aýdanyna qarasty Almaly aýylynyń turǵyndary aýyz sýdyń joqtyǵyna jáne kórsetilmegen kommýnaldyq qyzmet úshin negizsiz tólem alynatynyna shaǵymdandy. Bul isti «Nur Otan» partııasy nazarǵa alǵannan keıin jergilikti atqarýshy organ turǵyn úılerge sý berýdi qalpyna keltirý boıynsha jóndeý jumystaryn júrgizdi. Sondaı-aq kommýnaldyq qyzmetter qaıta esepteldi. Azamattardyń ótinishterine ýaqytyly jaýap bermegeni úshin Kóktóbe aýyldyq okrýginiń ákimi J.Jylqybekov partııalyq jaýapkershilikke tartyldy.

Qaraǵandy oblysynda múgedekter arbasyndaǵy er adamnyń pandýstyń joqtyǵynan Qazposhta bólimshesine kire almaıǵany qoǵamda qyzý talqylaǵan edi. Osy jaǵdaıdan keıin oblystyq komıssııa poshta jelisiniń barlyq fılıaldarynda erekshe qajettilikteri bar azamattar úshin yńǵaıly kóteriletin orynnyń bar-joǵyn tekserý týraly sheshim qabyldady.

«Nur Otan» partııasynyń baspasóz qyzmetinde atap ótkendeı, ótken jyly Partııalyq baqylaý komıteti men komıssııalary jeke jáne zańdy tulǵalardyń 1150 ótinishin qarap, 100-den astam rezonanstyq másele sheshimin tapty. Ortalyq jáne jergilikti atqarýshy organdarǵa 220-dan astam usynym engizdi. 2020 jyly 400-den astam adam partııalyq jaýapkershilikke tartyldy, olardyń qatarynda birqatar vıse-mınıstrler, óńir ákimderiniń orynbasarlary, máslıhattardaǵy fraksııa basshylary jáne t.b. bar. Olardyń ishinde partııa Jarǵysyna saı kelmeıtin áreketteri úshin 100-den astam adam «Nur Otan»-nyń qatarynan shyǵaryldy.