Atakásip tórt túliktiń biri sanalmasa da, elimiz shoshqa ósirý isine asa den qoıyp otyr. Agroónerkásip keshenin damytýdyń 2017-2021 jyldarǵa arnalǵan baǵdarlamasynda shoshqa etin óndirýdi 133 myń tonnaǵa jetkizý josparlanǵany sonyń bir aıǵaǵy. Osy oraıda shopan, aýyl sharýashylyǵy salasynyń sarapshysy Almasbek Sadyrbaev "jylqynyń aıǵyryna bólinetin memlekettik sýbsıdııa 100 myń teńge, atalyq shoshqaǵa bir analyq shoshqany uryqtandyrǵany úshin 40 myń teńge bólinedi.

Al bir atalyq shoshqa eki júz bas shoshqany shyǵaratynyn eseptesek, bir atalyq shoshqaǵa 8 000 000 teńge bólinedi eken. Al shoshqa jylyna eki ret uryqtanatynyn eskerseńiz 8 000 000 teńgeni eki eseleńiz. Sonda bir shoshqanyń atalyǵyna jylyna 16mln bólinedi. Shoshqany bulaı qoldaıtyn memleket álemde joq. Mal ósirseń shoshqa ósir, sýbsıdııasy onyń kól kósir... " deıdi.

Rasynda da, shoshqa ósirýge degen osynshalyqty memlekettik qoldaýdy kórgen basqa da sharýalar talpaq tanaý ósirýge qumartary anyq.  Sondyqtan byltyrdan beri shoshqa ósirýge qatysty mamandar arasynda tartys tolastamaı otyr.

Ekonomıst Nurlan Áripjanulynyń aıtýynsha, ekonomıkalyq ólshemge salsaq tutynýshysy tabylyp turǵanda paıdalanyp úlgerý úshin shoshqa óndirisin toqtatpaýymyz kerek.

– Biz shoshqany kóbeıtip ózimiz jeıin dep jatqan joqpyz. Qytaı tutynýshy retinde byltyrdan beri ekonomıkamyzǵa paıda ákelip otyr. Endeshe sony nege paıdalanbasqa?! Bul jerde bastysy ekonomıkalyq túsim. Ekonomıkalyq ólshemge salsaq tutynýshysy tabylyp turǵanda paıdalanyp úlgerý úshin shoshqa óndirisin toqtatpaýymyz kerek, – dedi ol.

Al áleýmettanýshy Nurbolat Aıekeshov "Tórt túlik maldyń sútin, terisin tıimdi paıdalansaq, utymdy kásip sol bolar edi" degen pikirde.

– Jerimizdiń 70 paıyzy jaıylym ekenin eskersek, tórt túlik maldy qoldap, onyń etin arzandatý arqyly halyqty qoljetimdi ónimmen qamtamasyz etýge jol ashylar edi. Qazir shyny kerek, ettiń qymbattaǵy sonshalyq, kópshiliktiń túsine kiretin bolyp júr. Qysty soǵymsyz qarsy alatyn qazaq kóbeıip barady. О́ıtkeni et baǵasy jyl ótken saıyn sharyqtap barady. Tórt túlik maldyń sútin, terisin tıimdi paıdalansaq, utymdy kásip sol bolar edi. Eger shoshqa ónidirisi sonshalyqty kóp tabys ákeletin bıznes bolsa, ony sýbsıdııalap ne kerek? Nege biz ózi dóńgelep turǵan kásipke memleket tarapynan kómek berýimiz kerek? Odan ózimizdiń atakásibimizdi damytaıyq. О́z halqymyz etsiz otyrǵanda, kórshimiz úshin shoshqa baqqan ne sánimiz?!,  dedi.

Osylaısha, qoǵamdaǵy kópshilik pikiri ekige jarylyp otyr. Al, siz ne deısiz?!

Qýanysh Ersuńqar

Avtormen onyń Facebook paraqshasy arqyly habarlasýǵa bolady.

Jazylyńyz

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir