"Qobaljý joq". Bekshın “Sputnik V” vaksınasyn saldyrdy

Almatyda koronavırýsqa qarsy erikti vaksınalaý naýqany bastaldy. Alǵashqylardyń biri bolyp qalanyń bas sanıtar dárigeri Jandarbek Bekshın reseılik "Sputnik V" vaksınasyn saldyrdy.

Bas sanıtar dáriger áýeli dárigerdiń tekserýinen ótti. Aldyn-ala onyń dene qyzýyn, qan qysymyn ólshep, onkologııalyq aýrýlardyń bar-joǵy anyqtady.

– Birinshi ret vaksına saldyryp turǵan joqpyn. Sapasy dáleldengen. Reseıde 2 mıllıonnan astam adam osy vaksınany saldyrdy. Munyń ózi vaksınanyń sapaly ekenin kórsetip tur. Sondyqtan eshqandaı qobaljý joq, vaksınanyń sapaly, jaqsy ekenine tolyq senimdimin, – dedi Bekshın.

Sondaı-aq, qala ákiminiń orynbasary Erjan Babaqumarov, qoǵamdyq densaýlyq saqtaý basqarmasynyń bastyǵy Narıman Tabynbaevqa da ekpe salyndy.

– Vaksınasııa – bul pandemııamen kúrestegi sheshýshi qadam. Búgin men onyń mańyzdylyǵyn, qaýipsizdigin kórsetý úshin vaksınany qabyldadym. Jaqynda ózimizdiń otandyq vaksına egýge daıyn bolady. Biz ǵalymdarǵa senemiz. Sondyqtan men qala turǵyndaryna – barlyǵyna osy qadamdy jasaýǵa keńes beremin. Vaksınalaý júrip jatqan kezde biz maska taǵýdy, áleýmettik araqashyqtyqty saqtaýdy jalǵastyrýymyz jáne vırýspen kúresýdiń basqa sharalaryn qoldanýǵa tıispiz, – dedi E. Babaqumarov.

Eske sala keteıik, prezıdent Qasym-Jomart Toqaevtyń tapsyrmasy boıynsha búginnen bastap Qazaqstanda koronavırýsqa qarsy "Sputnik V" vaksınasyn erikti túrde salý bastaldy.