Foto: Serik Abas-shahtyń facebook paraqshasynan
Belgili teleprodıýser Serik Abas-shah facebook paraqshasynda qazaqstandyqtardy QazUÝ qalashyǵy aýmaǵyndaǵy jer daýyna beı-jaı qaramaýǵa shaqyrdy. Jazba mátininiń tolyq nusqasy tómende usynylyp otyr.
Tańerteńnen beri eki-úsh tanysym habarlasty (jekege shyqty, sms tastady). Renjip jatyr, qysqasy, "KazGý qalashyǵyna tıisti jer(ler)diń "bólinetini bólinip", "satylatyny satylyp" qoıǵan. Endi kelip, Elbasynyń qyzyna jalbaqtap hat jazyp ne boldy sonsha? Jazsań, durystap jazsańshy" dep...
"Renishterdiń" maǵynasy shamamen osyndaı endi. Biraq "durystap jazý" degen ne osy? Asanqaıǵylanyp ahylap-úkileý me, qalǵan-qutqan shashymdy julyp ashý-yza bildirý me, joq álde osynyń bárin qurtqan sen dep aıyptaý ma, onsha túsinbedim.
Aǵaıyn,
A) "bólinip qoıdy", "satylyp qoıdy" dep otyra bersek, eshteńe ózgermeıdi. Búgin KazGý qalashyǵy, erteń basqasy... Al arǵy kúni úıińizdi tartyp alyp jatsa, "joǵarydaǵylar bólip qoıdy aý", "sóıtip sheship qoıdy ǵoı" dep otyra beresiz be?
Á) Hatty áleýmettik jeli arqyly prezıdentke de, bas partııanyń basshylyǵyndaǵy bir kisige de joldadym. Resmı túrde bolmasa da jetkizetinder jetkizgen shyǵar degen úmittemin. Endi búgin “joǵarydaǵylarǵa” sózi ótedi ǵoı dep Álııa Nazarbaevaǵa joldap otyrmyn. Ol úndemese basqasyna joldaımyn. Basqasy "baıqamasa", basqalaryna tynyshtyq bermeımin.
Al siz otyra (jata) berińiz. Báribir eshteńe ózgermeıdi.
Aıtpaqshy, umytyp baramyn.
Qurmetti KazGý túlekteri, osy másele boıynsha "ýlap-shýlap" jatqandardyń sany(myz) mol emes. Negizi (biz) kóppiz ǵoı. Nege úndemeısizder? Súıikti qalashyǵymyzdyń jerin bólshektep taratyp jatqanda, jandaryńyz nege aýyrmaıdy? Stýdentter, sizder nege beıǵamsyzdar? Almaty turǵyndary, qalanyń aýasy onsyz da ýlanyp bitkenin jaqsy bilesizder. Qazir qalanyń qaq ortasyndaǵy bos jerlerge ǵımarat emes, aǵash egý (otyrǵyzý) óte mańyzdy ekenin nege uqpaısyzdar?
Qazaqstandyqtar, nemquraıly bolyp qalmasańdarshy! KazGý qalashyǵy – qazirgi atqaminerlerdiń ákelerinen qalǵan jer emes. Bul ata-babamyzdan qalǵan ortaq mura. Ony toıymsyz shıbórilerdiń jemi etpeı, keler urpaq úshin saqtap qalaıyq. Bul jerde siz ben bizdiń bala-shaǵamyz ben nemere-shóberemiz oqıdy áli (bolashaqta). Olar da óspeı me, órkendemeı me? Olardyń jasyl jelekke bólengen stýdentter qalashyǵynda emes, bıznes ortalyqtar men baı-shonjarlar meken etetin bıik úıler arasynda tunshyǵyp júrgenin qalaısyz ba? Men qalamaımyn.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir