Toqaev Reseı elshisin marapattady

Prezıdent Qasym-Jomart Toqaev Reseı federasııasynyń Qazaqstandaǵy elshisi Alekseı Borodavkındi II dárejeli «Dostyq» ordenimen marapattady. Bul týraly Aqorda saıty habarlady.

Saıt málimetinshe, marapattaý rásimi barysynda Toqaev eki el arasyndaǵy odaqtastyq qatynastardy, sondaı-aq, dostyq pen yntymaqtastyqty nyǵaıtý isine eleýli eńbek sińirgeni úshin Reseı elshisi Borodavkınge Qazaqstannyń joǵary memlekettik nagradasyn tabystap otyrǵanyn atap ótken.

– Siz halyqaralyq qatynastar máseleleri boıynsha bilikti maman retinde dıplomatııalyq ortalarda tanymalsyz. Reseı Federasııasynyń Qazaqstandaǵy tótenshe jáne ókiletti elshisi retinde memleketterimiz arasyndaǵy dostyqtyń turaqty bolýyna, máńgilik sıpat alýyna zor kúsh salyp kelesiz. Sizdiń atqarǵan úlken ári aýqymdy jumysyńyz úshin rızashylyq bildiremiz. Sonymen qatar siz jaqynda ǵana jeke ómirińizdegi eleýli mereıtoılyq datany atap óttińiz. Bul – keremet mereıtoı. Atalǵan marapat ta osy aıtýly oqıǵaǵa oraı berilip otyr, – dedi memleket basshysy.

Alekseı Borodavkın Qazaqstan men Reseı arasyndaǵy odaqtas qatynastary men ıntegrasııalyq baılanystardy damytýǵa jáne nyǵaıtýǵa qosqan úlesin joǵary baǵalaǵany úshin Qasym-Jomart Toqaevqa alǵys aıtty.

– Men bul marapatty elderimiz arasyndaǵy baılanystardy damytýǵa jeke ózimniń ǵana emes, sondaı-aq Qazaqstan baǵytynda eńbek etip jatqan barlyq reseılik dıplomattardyń, eń aldymen, elshiliktegi áriptesterimniń qosqan úlesine berilgen baǵa dep sanaımyn. Qurmetti Qasym-Jomart Kemeluly, bizdiń odaqtastyq, ıntegrasııalyq baılanystarymyzdy odan ári joǵary ári sapaly deńgeıge kóterý úshin bar kúsh-jigerimdi jumsaı beretinimdi nyq senimmen aıtamyn, – dedi Borodavkın.