Parlament depýtattarynyń jalaqysy belgili boldy

Qazaqstan Respýblıkasy parlamenti depýtattarynyń jalaqysy belgili boldy, dep habarlady Tengrinews.kz .

"Materıaldyq-tehnıkalyq qamtamasyz etý basqarmasy QR zańnamasyna sáıkes Qazaqstan Respýblıkasy Parlamenti depýtattarynyń jalaqysy jumys ótiline baılanysty 550 myńnan 800 myń teńgege deıin túrlenetindigin habarlaıdy", - delingen resmı saýalǵa berilgen jaýapta.

Aıta keteıik, 2019 jyly QR Parlamenti Májilisi depýtattarynyń jalaqysy - 684 874 teńge bolǵan jáne bul somaǵa depýtattyń eńbek ótiline qaraı ústeme qosylatyn.

Senat konstıtýsııalyq zańda belgilengen tártippen ár oblystan, respýblıkalyq mańyzy bar qaladan jáne Qazaqstan Respýblıkasynyń astanasynan eki adamnan ókildik etetin depýtattardan quralady. Senattyń saılanatyn depýtattarynyń jartysy árbir úsh jylda qaıta saılanady.

Májilis konstıtýsııalyq zańda belgilengen tártippen saılanatyn 107 depýtattan turady. Májilistiń 98 depýtaty saıası partııalardan partııalyq tizimder boıynsha biryńǵaı jalpyulttyq saılaý okrýginen jalpyǵa birdeı, teń jáne tóte saılaý quqyǵy negizinde jasyryn daýys berý arqyly saılanady. Májilistiń 9 depýtatyn Qazaqstan halqy Assambleıasy saılaıdy.

Parlament depýtaty bir mezgilde eki Palataǵa birdeı múshe bola almaıdy.

Eske salaıyq, bıyl 10 qańtarda parlament májilisi men máslıhaty depýtattarynyń saılaýy ótti. Bıylǵy saılaýǵa 5 partııa qatysty: "Aýyl" partııasy, Nur Otan partııasy, "Adal" partııasy, "Aq jol" partııasy, Qazaqstan Halyq partııasy. 

Bıylǵy parlament saılaýynyń qorytyndysy boıynsha májiliske úsh partııa ótti:

• Nur Otan (71,09 paıyz)
• Aq jol (10,95 paıyz)
• Qazaqstan Halyq partııasy (9,10 paıyz)