"Ustazdardyń avtorlyq kýrsyn uıymdastyrý kerek". Depýtattardyń mınıstrge usynysy

Búgin májilistiń jalpy otyrysynda Nur Otan partııasynyń fraksııa músheleri, depýtattar Janarbek Áshimjan men Juldyz Súleımenova bilim jáne ǵylym mınıstri Ashat Aımaǵambetovke depýtattyq saýal joldady. 

Depýtattar aldymen pedagog mamandardyń tapshylyǵy, ótpeli kezeńde jaqsy oqyǵan túlekterdiń pedagogıkalyq mamandyqtarǵa barmaıtyny týraly aıtyp, pedagogıkalyq joǵary oqý oryndaryndaǵy stýdentterdiń aýyl mektepterine kelmeıtinine nazar aýdardy. Osy turǵydan aýyl mektepterin úzdik támamdaǵan túlekterdi pedagogıka mamandyqtaryna úgitteý jumystaryn júıelendirip, jandandyrý qajettigin sóz etti.

– Ekinshi, pedagogıka mamandyqtaryndaǵy stýdentterdiń teorııalyq bilimin, pedagogıkalyq metodıkamen ushtastyrý maqsatynda pedagogıkalyq tájirıbeni avtonomdy negizde bir apta, eki apta, alty apta emes, 2 jylǵa, ıaǵnı II, III, IÚ kýrstarda mindetti biryńǵaı ári úzdiksiz pedagogıkalyq tájirıbesin engizýdi qarastyrýdy usynamyz, – dedi Juldyz Súleımenova.

Depýtattardyń aıtýynsha, JOO-ny bitirgen túlekterde ádistemelik bilim deńgeıiniń jetkiliksizdigi baıqalady.

– Úshinshi, kópjyldyq tájirıbe kórsetkendeı, pedagogıkalyq ýnıversıtetter túlekteriniń kópshiliginde orta mektepterde pándik jáne ádistemelik bilim deńgeıiniń jetkiliksizdigi baıqalady. Osy rette akademııalyq adaldyq qaǵıdattaryna negizdelgen táýelsiz negizde pedagogıkalyq joǵary oqý oryndary bitirýshi túlekteriniń pándik bilim deńgeıin tekserý tetikterin oılastyrý kerek, – delingen saýalda. 

Depýtattar JOO-da jańa ádis-tásilderdi úıretý úshin jańashyl ustazdardyń avtorlyq kýrstaryn uıymdastyrý keregin usyndy.

– Tórtinshi, pedagogıkalyq joǵary oqý oryndarynda qazirgi zamandaǵy jańa ınnovasııalyq-pedagogıkalyq tehnologııany, ádis-tásilderdi stýdentterge tıimdi úıretý maqsatynda onlaın negizde elimizdegi novator ustazdardyń avtorlyq kýrstaryn uıymdastyrýdy usynamyz, – dedi depýtattar.

Sondaı-aq depýtattar mektepterdegi jaratylystaný-matematıka baǵyttaryndaǵy pán muǵalimderiniń tapshylyǵyn azaıtýǵa septigin tıgizetin usynysty da aıtty.

– Besinshi, pedagog mártebesi týraly zańnyń pedagogke kásibı qyzmetke ruqsat berý dep atalatyn 10-babynyń jalpy beıini sáıkes kelmeıtin pedagogıkalyq nemese kásiptik bilimi bar adamdarǵa, sondaı-aq pedagogıkalyq bilimi joq, biraq daıarlyqtyń tıisti baǵyty boıynsha joǵary, joǵary orynnan keıingi tehnıkalyq jáne kásiptik bilimi bar adamdarǵa tıisti pedagogıkalyq qaıta daıarlaýdan ótkennen keıin pedagog retinde kásibı qyzmetpen aınalysý quqyǵy beriledi dep kórsetilgen 3-tarmaǵyn oryndaý mehanızmderin oblystyq, qalalyq jáne aýdandyq bilim bólimderi birlese otyryp jetildirý qajet dep oılaımyz. Bul norma óz kezeginde búgingi tańda mektepterdegi jaratylystaný-matematıkalyq baǵyttardaǵy pán muǵalimderiniń tapshylyǵyn azaıtýǵa septigin tıgizedi degen oıdamyz, – delingen depýtattar saýalynda.