Májilis premer-mınıstrdi bekitti

Búgin parlament májilisiniń jalpy otyrysynda úkimet basshysy laýazymyna Asqar Mamın bekitildi. 

Asqar Mamındi osy laýazymǵa prezıdent Qasym-Jomart Toqaev usynǵan bolatyn.

Asqar Uzaqbaıuly Mamın 1965 jyly Selınograd qalasynda dúnıege kelgen.

Selınograd ınjener qurylysy ınstıtýtyn, G. V. Plehanov atyndaǵy Reseı ekonomıkalyq akademııasyn ınjener-qurylysshy, ekonomıst mamandyǵy boıynsha támamdaǵan.

Eńbek jolyn «Selıntıajstroı» tresinde montajdaýshy bolyp bastaǵan. 1996–2008 jyldar aralyǵynda Astana qalasy ákiminiń birinshi orynbasary, kólik jáne kommýnıkasııalar vıse-mınıstri, ındýstrııa jáne saýda birinshi vıse-mınıstri, Qazaqstan Respýblıkasy kólik jáne kommýnıkasııalar mınıstri, Astana qalasynyń ákimi qyzmetterin atqarǵan.

2008 jylǵy sáýirden bastap – «Qazaqstan temir joly» ulttyq kompanııasy» aksıonerlik qoǵamynyń prezıdenti. 

2016 jylǵy 9 qyrkúıekten bastap – QR Premer-Mınıstriniń Birinshi Orynbasary. 2019 jylǵy 25 aqpannan bastap Qazaqstan Respýblıkasy Prezıdentiniń Jarlyǵymen QR Premer-Mınıstri bolyp taǵaıyndaldy.

«Eren eńbegi úshin» medalimen (1998), «Qurmet» ordenimen (2006), ekinshi dárejeli «Barys» ordenimen (2011), Áýlıe knıaz Máskeýlik Danııldiń úshinshi deńgeıli ordenimen (2010), Fransýz Respýblıkasynyń Qurmetti Legıony (2013) jáne Latvııa Respýblıkasynyń «Tanym kresti» ekinshi deńgeıli ordenimen (2013), Ispanııa Koroldiginiń «Azamattyq eńbegi úshin» birinshi deńgeıli ordenimen (2014) marapattalǵan.

Astana qalasynyń qurmetti azamaty (2011), Qurmetti temirjolshy (2012), Qazaqstannyń qurmetti qurylysshysy (2013).