14 Qańtar, 2021 NEWS
Foto: bilimdinews.kz
Bilim jáne ǵylym mınıstri Ashat Aımaǵambetov facebook paraqshasynda bilim berý máseleleri jónindegi zańnamaǵa engizilgen jańa túzetýler týraly jazdy.
– Birinshi, endi joǵary oqý oryndarynda oqý jetistikterin syrttaı baǵalaý prosedýrasy júrgizilmeıdi. Joǵary oqý oryndaryna akademııalyq erkindik berilgen. Ár JOO oqý baǵdarlamalaryn óz betinshe ázirleıdi. Sondyqtan mundaı baǵalaý túrin júrgizýdiń qajeti joq.
Ekinshi, 2021 jyldan bastap árbir joǵary oqý orny bilim alǵan azamattarǵa jeke úlgisi boıynsha dıplom beretin bolady. Iаǵnı, endi ár joǵary oqý ornynda beriletin dıplomdardyń barlyǵy birkelki bolmaıdy. Ár oqý orny jeke brendke aınalyp, stýdentter oqý oryndaryn bilim berý sapasyna qaraı tańdaıtyn bolady. Budan bylaı memlekettik úlgidegi dıplomdar berilmeıdi, – dedi mınıstr.
Onyń aıtýynsha, endi grantpen oqyǵan túlekter tek memlekettik mekemelerde emes, jekemenshik uıymdarda da grantty óteı alady.
– Úshinshi, memlekettik grant arqyly oqýǵa túsken stýdentterdiń grantty jumyspen óteý sharttary jeńildetildi. Endi túlekter tek memlekettik mekemelerde ǵana emes, jekemenshik uıymdarda da jumys istep, granttaryn óteı alady. Basty shart – daıyndyq baǵyty (mamandyǵy) boıynsha jumys isteýi tıis, – dedi Aımaǵambetov.
Mınıstr stýdent grantta neshe jyl oqysa, sonsha jyldy jumyspen óteý keregin atap ótti.
– Tórtinshi, grant ıegerin oqytýǵa memleket jumsaǵan shyǵyndardy óteý boıynsha jańa norma engizildi. Máselen, stýdent grantta eki jyl oqyp, keıin aqyly bólimge aýysty delik. Bul jaǵdaıda stýdent qansha jyl grantta oqysa, sonsha jyl grantty jumyspen óteýge mindetti bolady. Dál osy norma, aqyly bólimnen grantqa aýysqan stýdentterge de qatysty bolady.
Besinshi, endi qaramaǵynda kolledjderi bar joǵary oqý oryndary da tehnıkalyq jáne kásiptik bilim berý baǵyty boıynsha memlekettik tapsyrysty ornalastyrý rásimine qatysa alady, – dep jazdy ol.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir