Parlament májilisi saılaýyna qatysqan jýrnalıst, "Adal" partııasynyń múshesi Maqsat Tolyqbaı óziniń paraqshasynda oqyrmandaryna ýáde etken úndeýin jarııalady. Onyń aıtýynsha, jumys endi bastalady. Demokratııa, ózgeris ózdiginen kele salmaıdy.

–  Májiliske men ótpeı qalǵan shyǵarmyn. Sizder qoldaǵan, daýys bergen "Adal" partııasynyń biraz azamattary depýtat bolyp jatyr. Oblysqa, aýdanǵa.

Keıbir adamdar túsinbeı de jatyr. Parlamentke ótken úsh partııa ne isteıdi? Olar ózdiginen zań shyǵarmaıdy. Qoǵamdyq tyńdaý, talqylaý bolady. "Adal" partııasy retinde bizder sol ár zań jobasyn talqylaýǵa qatysamyz. Biz de pikirimizdi aıtamyz, biz de málimdeme jasaımyz. Onyń syrtynda men óńirlerdi aralap júrgende kótergen máselem bar ǵoı. "Ár qazaq baı bolsynshy" degen. Kásip bastaǵysy keletin jumyssyz jastarǵa tegin granttardyń sanyn kóbeıtýimiz kerek. Mine, búgin partııa sheshim qabyldady. Aldaǵy ýaqytta "Adal" partııasynyń atynan biz tegin granttar taratatyn bolamyz. Sol jumys jalǵasa beredi. Tek úsh-aq nárse jetispeı qaldy bizge: jumsaq kreslo, tegin baspana jáne mıllıon teńge aılyq. Dalada qalǵan eshteńemiz joq. Qarapaıym oryndyqta otyryp ta jumys isteýge bolady.

Árıne, úmit bolmady emes, boldy. Biraq saılaýdy ótkizgen men emes qoı. Ol qalaı ótti, táýelsiz baqylaýshylar nendeı baǵa berdi? Onyń barlyǵyn ashyq aıtqan eki kandıdat bolsa, sonyń biri menmin. Ashyq pikirimdi bildirdim... Bul saılaý qalaı ótti, biz – sonyń kórinisimiz. Biraz azamattyń oıanýyna bizdiń de septigimiz tıdi dep oılaımyn. "Adal" partııasy eshqaıda joǵalyp ketpeıdi. Naǵyz jumys endi bastaldy. Orta jolda men partııadan shyǵyp ketsem, meniń tarapymnan satqyndyq bolady. Eger mende azamattyq ambısııa bolmasa, kresloǵa qyzyǵatyn adam bolsam, kez kelgen partııanyń atynan úgit-nasıhat jumystaryn júrgizip, qatysýyma bolar edi. "Adalǵa" adal boldym dep oılaımyn, – dedi jýrnalıst.

Oǵan qosa, Maqsat Tolyqbaı ózine qarsy jazba jarııalaǵandarǵa qatysty da pikir bildirdi.

Maǵan qarsy post jazyp, 40 myń teńge alǵandar boldy. Osy vıdeony ózderi kórip otyr. "Maqsat Tolyqbaı sáláfıt, Bolat Nazarbaevtan kottedj alǵan, Ablıazovtyń tyńshysy" dep jazǵandar da boldy. Bir nárseni túsindim. Bul úlken saıası tehnologııa. Kim ramkadan shyqqysy keledi, kim ózgergisi keledi, osylaı aıaqtan tartýshylar bolady. Birimizdi birimiz aıaǵymyzdan shalatyn bolsaq, eshqashan basymyz birikpeıdi. 37-jyldan berip solaı, aǵaıyn. Qazaqty satqan da qazaq, atqan da qazaq. Sondyqtan ár azamatty qoldaýymyz kerek. Aıaqtan tartyp otyrsaq, eshteńe ózgermeıdi. Bir úlken istiń basy bastaldy. Bir aıdyń ishinde ne isteı alatynymyzdy kórsettik. 27 kún ishinde eshqandaı partııanyń tarıhynda bolmaǵan, 360 myń adamdy múshelikke ótkizdik, – degen ol mıtıngke shyǵýdyń oıda bolǵanyn, alaıda oǵan qoǵam daıyn emes ekendigin aıtty, – Mıtıngke shyǵý oıda bolmady emes, boldy... Ashy da bolsa aıtaıyn, mundaıǵa bizdiń qoǵam áli daıyn emes. Men atoılap alańǵa shyǵaıyn, artymnan kóp bolsa 2000 adam erip shyǵady. Sodan ne ózgeredi? Sóıtip tarqaımyz, – dedi ol.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir