Shymkent qalasy jáne Aqmola, Aqtóbe, Almaty, Shyǵys Qazaqstan, Qostanaı, Qyzylorda, Mańǵystaý oblystarynda karantındik shekteý sharalary kúsheıtildi. Bul týraly oblystardyń bas sanıtar dárigerleri málimdedi.

Shymkent qalasynyń bas sanıtar dárigeri Ábdimanap Týlebaev karantındi kúsheıtýge qatysty jańa qaýly shyǵardy.

"Shymkent qalasynyń aýmaǵynda 11 qańtar saǵat 00:00-den bastap 25 qańtar saǵat 00:00-ge deıin karantın jáne shekteý sharalary uzartylsyn" delingen qaýlyda.

 Jańa qaýlyǵa sáıkes: 

  • adamdardyń kóp jınalýyna baılanysty kez kelgen is-sharalardy ótkizýge tyıym salynady (banket, toı, eske alý, týǵan kún, mereıtoı, shyǵaryp salý, qudalyq);
  • 65 jastan asqan adamdardyń qalada júrýine shekteý qoıylady;
  • qalada júrgende maska rejımin saqtaý jáne adamdar arasynda keminde 2 metrge deıin áleýmettik qashyqtyqty saqtaý qajet;
  • qoǵamdyq tamaqtaný oryndarynda antıseptık qoldaný, karantın rejımin eskerý kerek.

Aqmola oblysynyń bas sanıtar dárigeri Aınagúl Mýsına karantın sharalary týraly qaýlyǵa ózgerister men tolyqtyrýlar engizdi.

Qaýlyǵa sáıkes:

  • kópshilik jınalatyn saltanatty, otbasylyq, estelik, ujymdyq jáne basqa da is-sharalardy ótkizbeı, jumys tártibi saǵat 9-den 20-ge deıin, kelýshilerdiń sany 50%-ǵa deıin, biraq otyratyn oryn 30-dan artyq emes, ústel arasyndaǵy qashyqtyq 2 metrden kem emes jáne kelýshiler arasynda 1 metrden kem emes qashyqtyqty saqtaǵan jaǵdaıda qoǵamdyq tamaqtandyrý obektileriniń qyzmetine ruqsat beriledi;
  • senbi jáne jeksenbi kúnderi qyzmetin toqtata otyryp, jumys kúnderi aldyn ala jazylý boıynsha kelýshilerdiń sanyn 50%-dan asyrmaı jáne bir adamǵa 5 sharshy metrden kem emes oryndy qamtamasyz etip, fıtnes-ortalyqtary, trenajer zaldary men sport saýyqtyrý ortalyqtarynyń qyzmetine ruqsat beriledi;
  • COVID-19 taralýy men aldyn alý jónindegi is-sharalarǵa qatysatyn uıymdardan jáne tirshilikti qamtamasyz etetin kásiporyndardan, quqyq qorǵaý organdarynyń qyzmetkerlerinen jáne tótenshe jaǵdaılar qyzmetiniń qyzmetkerlerinen basqa; shtattyq kestede 15 jáne odan artyq qyzmetker bolǵanda, qyzmetkerlerdiń keminde 80%-y qashyqtan jumys atqarady;
  • senbi jáne jeksenbi kúnderi alańy 2000 sh.m.-den astam saýda oıyn-saýyq ortalyqtarynyń, saýda úıleriniń, saýda ortalyqtarynyń jumysyn toqtata otyryp, saýda oıyn-saýyq ortalyqtary, saýda úıleriniń, saýda ortalyqtarynyń qyzmeti shekteledi;
  • Balalar oıyn alańy men attraksıon qyzmetine tyıym salynady.

Qaýly 2020 jyldyń 14 qańtarynda saǵat 00.00-den bastap kúshine enedi.

Sondaı-aq Aqtóbe oblysynyń bas sanıtar dárigeri G. Daýletovanyń karantındi kúsheıtýge qatysty qaýlysyna sáıkes, atalǵan nysanalarǵa tyıym salynady:

  • konferensııalar, kórmeler, forýmdar, oıyn-saýyq, sporttyq, sondaı-aq adamdar kóp jınalatyn otbasylyq, saltanatty, estelik jáne basqa da is-sharalardy, onyń ishinde úıde, mıtıngter, sherýler, jıyndar jáne t.b.- tyıym salynady;
  • oıyn-saýyq mekemeleriniń, balalar oıyn alańdary jáne attraksıondar, jabyq úı-jaılardaǵy, batýttar, býkmekerlik keńselerdiń jáne loto-klýbtardyń qyzmetterine, onyń ishinde lotereıa utystaryna tyıym salynady;
  • bastaýysh, orta jáne negizgi orta deńgeıdegi bilim berý, orta jáne joǵary oqý uıymdaryndaǵy ashana jumysy shekteledi;
  • 30 adamnan asyrmaı jınaqtaı otyryp, kúsheıtilgen sanıtarııalyq-dezınfeksııalyq rejımdi saqtaǵan jaǵdaıda, oblystyq komandalardy daıarlaý úshin oqý-jattyǵý jıyndaryn qaıta bastaýǵa ruqsat beriledi.

Almaty oblysynyń bas sanıtar dárigeri Erǵalı Sydymanov karantındik jańa shekteý sharalary 11 qańtary saǵat 7:00-den bastap kúshine enetinin eskertti.

Qaýlyǵa sáıkes: 

  • 50-den asa otyratyn orny bar qoǵamdyq tamaqtaný obektileriniń (ashana, dámhana, kofe, meıramhanalardyń jáne basqa da mekemelerdiń) jumysy toqtaıdy;
  • oıyn-saýyq nysandarynyń jumysy toqtatylady;
  • Qoǵamdyq kóliktiń jumysy 23.00-ge deıin uzartylady;
  • oblys sheginen tys jerden qoǵamdyq kólikterdiń jumysyna ruqsat etiledi; 
  • Halyqqa qyzmet kórsetý ortalyqtary jumys kúnderi (dúısenbi-juma) saǵat 9:00-den 18:00-ge deıin, senbi kúnderi saǵat 9:00-den 14:00-ge deıin isteıdi.

Shyǵys Qazaqstan oblysynyń bas sanıtar dárigeri H. Ilıýbaev koronavırýs ınfeksııasynyń aldyn alý úshin óz qaýlysyna jańa ózgerister men tolyqtyrýlar engizdi.

Qaýlyǵa sáıkes:

  • buqaralyq otbasylyq, saltanatty, eske alý is-sharalaryn (banketter, úılený toılary, mereıtoılar, as berý), onyń ishinde úıde ótkizýge tyıym salynady;
  • ujymdyq dinı rásimderdiń (juma namaz) ótkizilýine jol berilmeıdi;
  • tamaqtaný zalyndaǵy otyratyn oryndar sanynyń 30%-nan aspaıtyn toltyrylýymen bilim berý jáne tárbıeleý uıymdarynda qoǵamdyq tamaqtandyrý obektileriniń jumysyna ruqsat beriledi;
  • kontıngenti 300 oqýshyǵa deıin qalalyq jáne aýyldyq mektepterde synyptardaǵy balalar sany 15 adamǵa deıin dástúrli formatta oqytýǵa ruqsat etiledi.

Qostanaı ​​oblysynyń bas sanıtar dárigeri V. Nechıtaılo karantın talaptaryna birqatar ózgerister engizdi.

Qaýlyǵa sáıkes:

  • óńirler arasynda jeke avtokóliktiń júrip-turýyna ruqsat beriledi;
  • Qostanaı oblysy eldi mekenderiniń aýmaǵynda turǵyndardyń maska rejımin, áleýmettik qashyqtyqty saqtaı otyryp, 3 adamnan aspaıtyn toppen nemese bir otbasy múshelerimen ýaqyt boıynsha shekteýsiz júrip-turýyna ruqsat beriledi;
  • oıyn-saýyq, sporttyq is-sharalardy, kórmelerdi, forýmdardy, konferensııalardy, sondaı-aq otbasylyq, estelik is-sharalardy ótkizýge tyıym salynady;
  • kınoteatrlardyń, býkmekerlik keńselerdiń qyzmeti toqtatylady;
  • fýdkort, banket zaldarynyń qyzmetine tyıym salynady;
  • mádenıet obektileriniń (jeke, toptyq daıyndyqtar), teatrlardyń qyzmeti toqtatylady.

Qyzylorda oblysynyń bas sanıtar dárigeri D. Janabergenova karantın sharalary týraly №1 qaýlysyna ózgerister engizgenin málimdedi.

  • oıyn-saýyq, sporttyq is-sharalardy, kórmelerdi, forýmdardy, konferensııalardy, sondaı-aq otbasylyq, saltanatty, estelik is-sharalardy (banketter, úılený toılary, mereıtoılar, eske alý), onyń ishinde úıde jáne adamdar kóp jınalatyn ózge de is-sharalardy ótkizýge tyıym salynady;

  • kezekshi toptardy qospaǵanda, mektepke deıingi balalar mekemeleriniń qyzmetine tyıym salynady;

  • sportshylar Qazaqstannan tys jerlerde oqý-jattyǵý jıyndary men jarystarǵa qatysýǵa shyǵa almaıdy;
  • qala mańyndaǵy jolaýshylar poezdarynyń qozǵalysyna ruqsat beriledi;

  • jeke avtokóliktiń óńirler arasynda júrýine ruqsat etiledi.

Mańǵystaý oblysynyń bas sanıtar dárigeri G.Nadýev koronavırýs ınfeksııasynyń aldyn alý týraly qaýlysyna tómendegideı tolyqtyrýlar men ózgerister engizdi:

  • konferensııalar, kórmeler, forýmdar, oıyn-saýyq, sondaı-aq adamdar kóp jınalatyn otbasylyq, saltanatty, estelik jáne basqa da is-sharalardy ótkizýge tyıym salynady; 
  • sportshylarǵa Qazaqstannan tys jerlerde oqý-jattyǵý jıyndary men jarystarǵa qatysýy úshin shyǵýyna tyıym salynady;
  • karantın rejımin saqtaı otyryp, qala mańyndaǵy jolaýshylar avtobýsynyń qozǵalysyna ruqsat etiledi.

Sonymen qatar 2020-2021 jyldyń III toqsanynan bastap:

  • karantın talaptaryn saqtaı otyryp, pánderdiń 70%-yn dástúrli formatta, 30%-yn qashyqtan oqytý formatyna kóshiriledi; 
  • 15 baladan aspaıtyn kezekshi toptardy uıymdastyra otyryp, mektepke deıin mekemelerdiń qyzmetine ruqsat beriledi.
"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir