Vıse-mınıstr oqý jylynyń úshinshi toqsany qalaı oqytylatynyn aıtty

Mektep bitirýshi synyptar úshin pánderdiń 70%-y dástúrli formatta ótedi. Bul týraly  bilim jáne ǵylym vıse-mınıstri Sholpan Karınova málimdedi.

– Koronavırýs ınfeksııasynyń taralýyna jol bermeý jónindegi vedomstvoaralyq komıssııanyń sheshimi boıynsha 2020-2021 oqý jylynyń III toqsanynan bastap oqý prosesi ata-analardyń nemese zańdy ókilderdiń ótinishi boıynsha 1-5 synyp oqýshylary úshin kezekshi synyptarda dástúrli formatta jalǵasady. Bul rette mektepterde sanıtarlyq talaptar saqtalyp, bir synypta 15 adamnan artyq adam bolmaýǵa tıis, – deıdi vıse-mınıstr.
⠀
Sondaı-aq ol oqýshylar sany 300-den aspaıtyn mektepterde oqý dástúrli formatta jalǵasatynyn aıtty.
⠀
– Menshik nysanyna qaramastan bilim berý uıymdarynyń bitirýshi synyptary úshin oqytý aralas formatta uıymdastyrylady: pánderdiń 70%-y dástúrli formatta, al 30%-y qashyqtan oqytylady. Bıyl elimiz boıynsha bitirýshi synyptardaǵy oqýshylardyń sany 440 myńnan astam adamdy quraıdy.
⠀
Oqý prosesin aralas formatta uıymdastyrý kezinde sanıtarlyq-epıdemıologııalyq normalar saqtalyp, sabaqtardyń ıkemdi kestesi qurylady. Sonymen qatar áleýmettik qashyqtyqty saqtaý úshin aýysymdar men kishi aýysymdar sany ulǵaıtylyp, árbir synyp úshin sabaq arasyndaǵy úzilister ár túrli ýaqytta uıymdastyrylady. Sanıtarlyq talaptarǵa sáıkes mektepke kirý kezinde bilim alýshylar men pedagogterdiń dene qyzýyn kúndelikti ólsheý qajet.
⠀
Sondaı-aq qajet bolǵan jaǵdaıda pedagogterdiń, oqýshylardyń jáne olardyń ata-analarynyń qalaýy boıynsha shtattyq formatta bilim alyp jatqan oqýshylar úshin mektepte jeke konsýltasııalar ótkizýge ruqsat etilgen. Bir topta 5 adamnan artyq bolmaýǵa tıis, – dep atap ótti Sholpan Karınova.