"Baqylaýshylarymyzǵa óte qıyn". Saılaýdaǵy zańsyzdyqtar týraly habarlandy

Táýelsiz baqylaýshy Ǵalymjan Orazymbet elde ótip jatqan parlament májilisi men máslıhattar depýtattarynyń saılaýynda tirkelgen birqatar zańsyzdyqtar týraly aıtty. Bul týraly ol óziniń áleýmettik jelidegi paraqshasynda jazýda.

– Almatyda ýchaskege baqylaýshyny kirgizbeı qoıǵan. PTR-yń jaramsyz. PTR jasaýǵa ruqsaty bar klınıkalar tiziminde sen jasaǵan klınıka joq dep. Dál qasyndaǵy ýchaskede ondaı talap joq. Jýrnalıster bara jatqanda kirgizdi. Álgi qujat týraly eshteńe aıtylmady sosyn, –  dedi ol.

Sonymen qatar baqylaýshy Almaty qalasyndaǵy №386 saılaý ýchaskesine "oryn joqtyǵyn" jeleý etip baqylaýshylardy kirgizbeı jatqanyn aıtty.

Onyń sózinshe, Almaty oblysyndaǵy №463 ýchaskede de zańsyzdyqtar bolǵan. Bir ýchaskede "bir uıymnan eki baqylaýshy bolmaıdy" dep shyǵaryp jibergen. 

– Bir ýchaskelerde nurbaqylaýshylar bizdiń baqylaýshylardy fotoǵa túsirip, arandatýǵa tyrysyp jatyr. Baqylaýshylardy baqylaıtyn top daıyndap jatqandar týraly aldyn bilgenbiz. Endi iste kórip otyrmyz. Baqylaýshylarymyzǵa óte qıyn. Bir jaǵynan komıssııa, ekinshi jaǵynan "áriptesteri", – dep jazdy táýelsiz baqylaýshy.