07 Qańtar, 2021 Áleýmet
Foto: Ashyq derekkóz
Maqalany jazyp otyrǵanymyzdyń mánisi, dana qazaqta «Aýyzǵa kelgen túkirik, qaıta jutsa mákúrik» degen mátel bar. Kúnde oıymdy ishimde qaldyryp, mákúrik juta bergenshe aıtyp tynaıyn dep sheshtim. Onyń ústine on jarym aı «typ-tynysh» jatqan Sizdiń 4 qarasha kúni shyqqan, búkil qazaq zııalylary izdep júrip oqıtyn qabyrǵaly «Qazaq ádebıeti» gazetinde, óz basym batyldyǵy men tapqyrlyǵyn úlgi tutatyn, belgili jýrnalıst Nurtileý Imanǵalıulyna bergen suhbatyńyz jarııalandy. Muny biraz gazetter men aqparattyq portaldardyń kóshirip basqany da anyq. Ile-shala áleýmettik jelilerde «Tasmaǵambetov kópshilik kútip otyrǵan dúnıelerdi batyl aıta almapty» degen syńaıdaǵy syn pikirler de kórindi. Meıli, «árkim – óz baqytynyń ustasy» degendeı, árkim óz oıynyń da ıesi ǵoı, olarǵa da min taǵýǵa bolmas. Biraq bir nárse aıqyn, el Sizden áli kúnge úmit etip otyr. Ol – zańdy da.
«Dos – kózine maqtamaıdy» deıdi, áıtse de eliniń erteńine, urpaǵynyń bolashaǵyna alańdaıtyn qalyń eliń, qazaǵyńnyń Sizdeı el úshin, ult úshin jan kúıdirip qyzmet etken ultjandy azamattan kóp nárseni kútetini sózsiz.
Siz Táýelsiz Qazaqstan memleketin quryp, ony jer-jahanǵa áıgilegen tuńǵysh prezıdentimiz Nursultan Ábishuly Nazarbaevtyń eń senimdi serikteriniń biri emes, biregeıi boldyńyz. Keleshekte de Elbasynyń esimi Máńgilik eldiń esinde máńgi saqtalatyndaı qyzmet etetin Sizdeı tulǵa az.
Áý basta tuńǵysh prezıdentimiz júrgizgen saıasattyń sabaqtastyǵy saqtalatynyn aıtqan jańa prezıdentimiz Qasym-Jomart Kemeluly Toqaev ta Sizdeı ultjandy, ana tilinde sheshen sóıleıtin, qandaı qyzmetti de múltiksiz, tııanaqty atqaratyn tegeýrindi kadrǵa muqtaj ekenin ýaqyttyń ózi kórsetip tur. О́ıtkeni, qazaqtyń qazaq bolyp qalýy, quldyq sanadan arylyp, rýhanı jańǵyrýy, ultymyzdyń jańa bolmysy qalyptasyp, naǵyz táýelsiz elge aınalýy túptiń túbinde bir-aq nársege – qazaq tiline baılanysty bolyp tur. Siz muny suhbatyńyzda: «Bılik qaı tilde sóılese, halyq ta sol tilde sóıleıdi» dep dóp basyp aıtypsyz.
Qazir ulttyq sana oıanyp jatyr. Qoǵamnyń, ásirese jastardyń belsendiligi ertegilerde aıtylatyndaı, jyl, aı sanap emes, kún sanap, saǵat sanap artyp keledi. Onyń ústine Nıkonov, Feodorov, Jırınovskıı sııaqty Reseıdiń astamshyl tulǵalary qazaqtyń, qazaqtyń ǵana emes, búkil baýyrlas halyqtardyń namysyn da qaırap jatyr!
Buıyrtsa, endi alda parlament májilisi men jergilikti máslıhattarǵa saılaý ótedi. Bul ókiletti uıymdarǵa jas, jigerli, bastamashyl býyn keledi. Kóp nárse ózgeredi. Jańalyq, jaqsylyq kóbeıedi. Biraq atqarýshy bılik Sizdeı tulǵaǵa zárý ekenin eshkim joqqa shyǵara almasa kerek. Eń bastysy, elimizdiń saıası bıliginde, qalyń halyq pen zııaly qaýym, jalyndy jastar arasynda Sizdi qurmetteıtin, memlekettik qyzmetke aralasqanyńyzdy qalaıtyn azamattar kópshilik ekenine kúmán joq. Joǵaryda aıtqanymdaı, Sizden el áli kúnge qyzmetke aralasady dep úmit etip otyr.
Eger zeınettemin, «ash qulaqtan tynysh qulaq» dep otyra beretin bolsańyz, zań barlyq azamatqa ortaq. Qyzmetińizden kemshilik izdeıtin bolsa, ondaı adamdar bizde jetip artylady. Sebebi, adamnyń bári pende. Negizi ultqa, elge qyzmeti qajet tulǵany qaı jasynda da memlekettik qyzmettiń arbasyna jegýge bolady.
Ana Amerıkany qarańyz, jańa saılanǵan prezıdenti ulyqtaý saltanaty tusynda 78 jasqa tolady eken, al qazirgi prezıdenti 74 jasta!
Eń mańyzdy nárse, uzaq jyl ultqa, memleketke eńbegi sińgen, baı tájirıbesi, Ahmet atamyz aıtqandaı minezi bar, onyń ústine halyqtyń qalaýysyna aınalǵan Sizdeı azamat tapjylmaı otyra beretin bolsa, endigi jastardyń boıyndaǵy ata-babadan kele jatqan kúreskerlik rýh ábden óledi. О́ıtkeni olardyń eshqaısysynda Sizdegideı tájirıbe, abyroı-bedel, tanymaldyq joq. Sondyqtan «Tasmaǵambetov túk istemegende bizdiń qolymyzdan ne keledi?» degen úmitsizdikke beriledi.
Al Siz:
Ereýli atqa er salmaı,
Egeýli naıza qolǵa almaı,
Eńký-eńký jer shalmaı...
Erlerdiń isi biter me?! – dep jyrlap, erlerdiń isi ne ekenin otty óleńimen urpaqqa uǵyndyryp ketken daýylpaz aqyn, qaıtpas batyr Mahambet О́temisuly jyrlaǵan er azamat emessiz be?!.
Qutmaǵambet QONYSBAI,
Mádenıet qaıratkeri
Qate tapsańyz, qajetti bólikti tańdap ctrl+enter basyńyz.
Usynylǵandar
Pikir qaldyrý
pikir