Toqaev: Jańa syn-qaterlerge daıyn bolýy kerek

Prezıdent Qasym-Jomart Toqaev Egemen Qazaqstan gazetinde jarııalanǵan "Táýelsizdik bárinen qymbat" maqalasynda búgingi jáne bolashaq urpaq jańa syn-qaterlerge daıyn bolýy keregin aıtty.

– Aldaǵy tórtinshi onjyldyqtyń bizge júkteıtin mindeti – qýatty eldiń ıesi jáne kemel halyq bolý. Bul jolda saıası-ekonomıkalyq reformalardy jáne sanany jańǵyrtý úderisin jalǵastyryp, zaman talabyna beıimdelgen ulttyń jańa bolmysyn qalyptastyrýymyz qajet.

Biz ádiletti qoǵam men tıimdi memleket qurýdy kózdep otyrmyz. Kez-kelgen iste ádildik qaǵıdatyn basshylyqqa alsaq, buǵan anyq qol jetkizemiz. Mysaly, turǵyndardyń turmysyn jaqsarta túspesek, elimizdiń jetistikteri men halyqaralyq tabystaryn maqtan etý artyq. Azamattarymyz ekonomıkalyq ósimniń ıgiligin sezine almasa, odan esh qaıyr joq. Men árbir sheshimdi qabyldar sátte osy ustanymdy basshylyqqa alamyn. Biz halyqtyń áleýmettik jaǵdaıyn jaqsartýmen qatar, barlyq azamattardyń múddesin birdeı qorǵaımyz. Meniń uǵymymdaǵy ádiletti memleket degenimiz – osy, – dedi ol.

Onyń aıtýynsha, ult pen el retinde saqtalyp qalý úshin urpaq jańa syn-qaterlerge daıyn bolýy kerek.

– Tarıhqa kóz júgirtsek, ár býyn belgili bir synaqty basynan ótkeredi. Bizdiń babalarymyz "Aqtaban shubyryndy, Alqakól sulamany", atalarymyz alapat asharshylyqty, qýǵyn-súrgindi, dúnıejúzilik soǵysty kórdi.

Totalıtarlyq kezeńde ulttyq qundylyqtarymyzdan, tilimizden, dilimiz ben dinimizden aıyrylyp qala jazdadyq. Onyń bári Táýelsizdiktiń arqasynda halqymyzǵa qaıta oraldy. Biraq, ult pen el retinde saqtalyp qalý úshin búgingi jáne bolashaq urpaq jańa syn-qaterlerge daıyn bolýy kerek, – dedi Toqaev.

Prezıdent jańa synaqtarda ulttyq bolmysymyzdan, tól mádenıetimizden ajyrap qalmaý keregin atap aıtty.

– Qazirgi pandemııa jáne sonyń saldarynan týyndaǵan daǵdarys búkil álemniń buryn bolmaǵan jańa synaqtarmen betpe-bet kelip otyrǵanyn anyq kórsetti. Ekonomıkalyq, áleýmettik, ekologııalyq, bıologııalyq jáne basqa da qaterlerge qosa, jer júzine jaǵymsyz ıdeologııalyq vırýstar da jaıylyp keledi. Jahandaný kezinde el jat jurttyń yqpalyna beısanaly túrde ilesip ketkenin ańǵarmaıdy. Basqasha aıtqanda, májbúrlikten emes, sanasynyń ýlanýy arqyly óz erkimen torǵa túsedi. Sondyqtan, jańa zamannyń jaqsy-jamanyn ekshep, artyqshylyqtaryn boıǵa sińirýmen qatar, tamyrymyzdy berik saqtaýymyz qajet. Ulttyq bolmysymyzdan, tól mádenıetimiz ben salt-dástúrimizden ajyrap qalmaý – barlyq órkenıetter mıdaı aralasqan alasapyranda jutylyp ketpeýdiń birden bir kepili, – dedi prezıdent.