Toqaev qazaqstandyqtardy jańa jyl merekesimen quttyqtady

Prezıdent Qasym-Jomart Toqaev qazaqstandyqtardy Jańa – 2021 jyldyń kelýimen quttyqtady.

"Sanaýly mınýttan soń 2020 jyl tarıh qoınaýyna enedi. Osy mereıli mezette eski jylmen qoshtasyp, bolashaqqa baǵdar túzemiz. Bul – bárimiz jaıdary kóńilmen bir-birimizge aq tilek arnaıtyn aıryqsha sát.

О́tip bara jatqan jyl kúlli álem jurtshylyǵynyń esinde qalatyn erekshe jyl boldy. Dúnıe júzi buryn-sońdy bolmaǵan alapat indetpen betpe-bet keldi. Bizdiń halqymyzǵa da onyń zardaby tıdi. Osyndaı qıyn kezeńde tutas ult bolyp birligimizdiń qadir-qasıetin jete sezindik. Dertke shaldyqqan árbir adamnyń tezirek saýyǵyp ketýin tiledik. Biraq indet adam talǵamaıdy. Pandemııanyń saldarynan kóptegen azamattarymyzdan aıyrylyp qaldyq. Olardyń ishinde elimizdi órkendetýge zor úles qosqan tanymal tulǵalar da bar. О́mirden ótken adamdardyń ımandary salamat bolsyn! Endi mundaı qasiret qaıtalanbasyn. Bul úshin qoldan kelgenniń bárin jasaımyz. Ár azamat memlekettiń qamqorlyǵynda bolady. Aldaǵy jyldan bastap koronavırýsqa qarsy tegin vaksına egýdi bastaımyz. Ony azamattardyń qalaýymen, erikti túrde júrgizemiz.

Osy kúrdeli kezeńde halqymyz bereke-birligi men yntymaǵyn arttyra tústi. Otandastarymyz bir-birine qol ushyn berip, janashyrlyq tanytty. Bul – shyn máninde, izgilik pen qaıyrymdylyqtyń úlgisi. Eń bastysy, biz bárimiz birge boldyq. Memleket tarapynan mıllıondaǵan adamǵa qoldaý jasaldy. Biz qoǵamnyń ıgiligi úshin qajyrly eńbek etip júrgen azamattardyń jumysyn baǵalaı bildik. Dárigerler, muǵalimder, tártip saqshylary, eriktilerdiń eren erligine kýá boldyq. Bul azamattar – beıbit kúnniń naǵyz batyrlary. Olarǵa halqymyz sheksiz rıza.

Kele jatqan Jańa jyl – qasıetti Táýelsizdigimizdiń 30 jyldyǵy. Biz egemen elimizdiń tarıhyndaǵy tórtinshi onjyldyqqa qadam basamyz. Bul – shyn máninde, asa mańyzdy beles. Biz keleshekte Qazaq eliniń qýatyn odan ári arttyra túsemiz. Barlyq saladaǵy reformalar laıyqty jalǵasyn tabady.

Meniń basty mıssııam – halqymyzdyń turmys sapasyn jaqsartý úshin sabaqtastyqqa negizdelgen tıimdi saıasat júrgizý. Biz aspen de, taspen de ulttyq múddelerimizdi tabandylyqpen qorǵaımyz. HHI ǵasyrdyń jıyrma birinshi jyly tolaǵaı tabystarǵa, jańa jetistikterge toly bolady dep senemin.

Osy bir erekshe sátte bárimizdiń arman-úmitimiz bir arnaǵa toǵysady. Bul – merekelik aqjarma tilek. Bosaǵadan enip kele jatqan jyl berekeli bolsyn! Tek jaqsylyq pen qýanysh ákelsin! Árbir shańyraqqa, árbir otbasyna amandyq, baqyt, yrys tileımin! Otanymyz órkendeı bersin!

Jańa jyl qutty bolsyn, aǵaıyn!" dedi prezıdent beıneúndeýde.