Aldaǵy saılaýda daýys berýdiń arnaıy algorıtmi tanystyryldy

Densaýlyq saqtaý vıse-mınıstri - bas sanıtar dáriger Erlan Qııasov Ortalyq saılaý komıssııasynyń otyrysynda Qazaqstan Respýblıkasy parlamenti májilisi men máslıhat depýtattaryna daýys berý kezinde koronavırýs ınfeksııasynyń taralýynyń aldyn alý jáne sanıtarlyq-epıdemıologııalyq qaýipsizdikti qamtamasyz etý jáne azamattardyń densaýlyǵyn qorǵaý algorıtmi jaıly aıtty.

Algorıtmge saı tómendegideı talaptar qoıylady:

- Árbir saılaý ýchaskesinde kireberiste medısına qyzmetkerleri nemese volonter kezekshilikpen termometr arqyly kelgen azamattardyń temperatýrasyn ólsheýi kerek;

- Qoldy dezınfeksııalaýǵa arnalǵan sanıtaızer bolýy tıis;

- Saılaýshylardyń qozǵalys baǵyty boıynsha araqashyqtyq belgiler men nusqaýlyq bolýǵa tıis;

- Paıdalanylǵan jeke qorǵanys quraldaryn tastaýǵa arnalǵan konteınerler, dene qyzýy kóterilgen (37ºS-tan joǵary) jaǵdaıda adamdardy oqshaýlaýǵa arnalǵan jeke oryn bolýy qajet.

Saılaý komıssııalarynyń qyzmetin uıymdastyrý kezinde komıssııa músheleri árbir 3 saǵat saıyn maskany aýystyrýǵa tıis, ishke kirgende qoldy tazalaý, al  qol alysýǵa jáne kelýshilermen jaqyn baılanysýǵa bolmaıdy, saılaý komıssııasy nysanyn ylǵaldy tazalap, jıhaz ben tehnıkalyq jabdyqty bir-birinen keminde 1,5-2 metr qashyqtyqta ornalastyrý qajet.

Budan basqa, saılaý bıýlletenderin taratqanda tikeleı baılanys ornatýǵa bolmaıdy.

Saılaýshylar jeke basyn kýálandyratyn qujatty saılaý komıssııasynyń múshesine kórsetedi, biraq qolyna berilmeıdi.

– Saılaýshylar saılaý ýchaskesine barǵanda medısınalyq maska jáne antıseptıkalyq suıyqtyq qoldanýy kerek. Bıýlletendi alǵan kezde komıssııa músheleriniń qolyna bermeıdi, jeke basyn kýálandyratyn qujatty ashyp kórsetýi kerek. Daýys berýge óz qalamyńyzdy ala kelińiz,  bolmaǵan jaǵdaıda saılaý komıssııasy bergen qalamdy paıdalanyńyz. Bala ertip kelýge bolmaıdy.

Úıde emdelýine baılanysty oqshaýlaý rejımindegi nemese koronavırýs ınfeksııasyna baılanysty karantınde otyrǵan daýys berýge qatysýshylar saılaý ýchaskesinen tys jerde daýys berý týraly ótinish bildirgen jaǵdaıda saılaý komıssııasynyń múshesine habarlaýǵa tıis, – dedi bas sanıtar dáriger.