Jańa qaýly. Qazaqstannyń 5 oblysynda karantın kúsheıtiledi

Pavlodar, Qyzylorda, Soltústik Qazaqstan, Jambyl, Aqmola oblystarynda karantındik shekteý sharalary kúsheıtildi. Bul týraly oblystardyń bas sanıtar dárigerleri málimdedi.

Pavlodar oblysynyń bas sanıtar dárigeri B. Álıev 30 jeltoqsanda karantın sharalary týraly qaýlysyna ózgerister men tolyqtyrýlar engizdi.

Qaýly 2020 jyldyń 31  jeltoqsanynda saǵat 00:00-den bastap kúshine enedi.

Atalǵan qaýlyǵa sáıkes:

• sporttyq is-sharalardy, otbasylyq, oıyn-saýyq, ujymdyq, korporatıvtik, saltanatty  is-sharalar jáne adamdar kóp jınalatyn ózge de is-sharalardy ótkizýge tyıym salynady;
• oıyn-saýyq mekemeleriniń (karaoke, bılıard, qorqor bólmeleri, kompıýter klýbtary, oıyn klýbtary, býkmeker keńseleri t.b.) qyzmetine tyıym salynady;
• kezekshi toptardy qospaǵanda, mektepke deıingi balalar mekemeleriniń qyzmetine tyıym salynady;
• 30-dan aspaıtyn adamnyń qatysýymen jeke, toptyq daıyndyqty qospaǵanda, teatrlardyń qyzmeti toqtatylady;
• 30%-dan aspaıtyn tolymdylyqty jáne bir kelýshige keminde 5 sharshy metrdi qamtamasyz etken jaǵdaıda, ýaqytyn shektemeı, aldyn ala jazylý boıynsha jeke jáne toptyq jattyǵýlarǵa sport keshenderi men sport nysandary, onyń ishinde fıtnes-ortalyqtarynyń, jattyǵý zaldary men sporttyq-saýyqtyrý ortalyqtarynyń qyzmetine ruqsat beriledi;
• 2020 jyldyń 31 jeltoqsannan bastap 2021 jyldyń 5 qańtaryna deıin jańa jyldyq erteńgilikter, merekelik korporatıvtik sharalar uıymdastyrýǵa jáne ótkizýge tyıym salynady;
• 2 metr araqashyqtyqty saqtaı otyryp, ashyq muz aıdyndarynyń jumysyna ruqsat beriledi.

Qyzylorda oblysynyń bas sanıtar dárigeri A.Abdıkaımova karantın sharalary týraly №25 qaýlysyna ózgerister engizgenin málimdedi.

Jańa qaýly boıynsha 2020 jyldyń 2 jeltoqsanynan 2021 jyldyń 05 qańtaryna deıin qoǵamdyq tamaqtaný oryndarynda, oıyn-saýyq obektilerinde, kásiporyndarda, mekemeler men keńselerde ujymdarmen uıymdastyratyn jańa jyldyq is-sharalardy ótkizýge tyıym salynady. 

Qaýly 2020 jyldyń 26 jeltoqsanynan bastap kúshine endi.

Al, Soltústik Qazaqstan oblysynyń bas sanıtar dárigeri A. Kúshbasov 2020 jyldyń 11 jeltoqsandaǵy № 38 qaýlysynda:

• oıyn-saýyq, sporttyq is-sharalar, kórmeler, forýmdar, konferensııalar, sondaı-aq otbasylyq, mereıtoılyq is-sharalardy (banketter, úılený toılary, mereıtoılar, eske alý sharalary) ótkizýge tyıym salynady;
• jańa jyldyq keshter men merekelik korporatıvtik is-sharalarǵa tyıym salynady;
• oıyn-saýyq mekemeleriniń (karaoke, bılıard, kompıýterlik klýbtar, túngi klýbtar, boýlıng ortalyqtary, balalar oıyn alańdary men jabyq attraksıondar, batýttar jáne basqalary), býkmekerlik keńselerdiń, kalıan barlarynyń, akvaparkterdiń qyzmeti toqtatylady;
• qoǵamdyq tamaqtaný obektileriniń jumys ýaqyty 08.00-den 22.00-ge deıin isteıdi;

Qaýly 2020 jyldyń 26 jeltoqsanynda saǵat 00:00-den bastap kúshine endi.

Jambyl oblysynyń bas sanıtar dárigeri N. Mýlıkova  2020 jyldyń 28 jeltoqsandaǵy № 41 qaýlysyna ózgerister men tolyqtyrýlar engizdi. 

Atalǵan qaýlyǵa sáıkes, bas sanıtar dárigerdiń birqatar qaýlysynyń kúshi joıylady.

Sondaı-aq Taraz qalalyq jáne Jambyl oblysynyń aýdandyq bas sanıtar dárigerleri epıdemıologııalyq jaǵdaıǵa baılanysty karantındik sharalardy qatańdatý týraly sheshim qabyldaýǵa quqyly.

Aqmola oblysynyń bas sanıtar dárigeri Aınagúl Mýsına karantındik jańa shekteý sharalary 30 jeltoqsanda saǵat 7:00-den bastap kúshine enetinin eskertti.

Jańa qaýlyǵa sáıkes: 

• saltanatty jáne otbasylyq is-sharalardy ótkizýge tyıym salynady (banket, toı, eske alý, týǵan kún, mereıtoı, shyǵaryp salý, qudalyq);
• kópshilik jınalatyn is-sharalarǵa barýǵa tyıym salynady;
• jerleý is-sharalaryn júrgizý kezinde keminde 2 metr araqashyqtyqty saqtaı otyryp, keminde 30 adamnan artyq adam jınalmaýy kerek;
• sporttyq is-sharalardy ótkizýge, kórmeler, forýmdar, konferensııalar, sondaı-aq otbasylyq, eske alý sharalaryn (banketter, úılený toılary, mereıtoılar, eske alý kúnderi) úıdegi jáne basqa da kóptegen adamdar jınalatyn is-sharalardy ótkizýge tyıym salynady;
• jańa jyldyq erteńgilikterin, merekelik korporatıvterdi uıymdastyrýǵa jáne ótkizýge 2020 jyldyń 30 jeltoqsanynan bastap 2021 jyldyń 5 qańtaryna deıin tyıym salynady.