Jańa qaýly. Qazaqstannyń 5 óńirinde karantın kúsheıtiledi

Nur-Sultan qalasy jáne Qaraǵandy, Aqtóbe, Qostanaı, Mańǵystaý oblystarynda karantındik shekteý sharalary kúsheıtildi. Bul týraly oblystardyń bas sanıtar dárigerleri málimdedi.

Nur-Sultan qalasynyń bas sanıtar dárigeri J.Pralıeva karantındik shekteýlerge qatysty jańa qaýly shyǵardy.

25 jeltoqsannan bastap sýpermarketter men gıpermarketterge táýlik boıy jumys isteýine ruqsat beriledi.

Qaýlyǵa sáıkes 26 jeltoqsannan bastap: 

• Oryndar sanyn 30%-dan asyrmaı, kórermenderdi eki oryn saıyn jáne qatar boıynsha shahmat tártibimen otyrǵyzý arqyly, kúsheıtilgen sanıtarlyq-epıdemıologııalyq normalardy saqtaı otyryp kınoteatrlardyń jumys isteýine ruqsat etiledi.
• Kınoteatrlar jumys, demalys jáne mereke kúnderi saǵat 10:00-den 24:00-ge deıin jumys isteıdi, aksııalar ótkizilmeıdi.

Eger karantın jáne shekteý sharalaryn buzý faktisi anyqtalsa, kınoteatrlardyń jumysy toqtatylady.

• Mereke qarsańynda meıramhanalardyń, kafelerdiń, barlardyń, ashanalardyń jumys ýaqyty úlken kezekter týyndaýyna jol bermeý maqsatynda saǵat 24:00-ge deıin uzartylady. 

Bul rette ǵımarat ishinde 30 orynnan artyq bolmaýy, sanıtarlyq-epıdemıologııalyq, sanıtarlyq-profılaktıkalyq sharalar saqtalýy, ústelder arasynda keminde 2 metr áleýmettik araqashyqtyq saqtalýy, ár ústelge 4-6 adamnan artyq otyrǵyzylmaýy qadaǵalanýy kerek.

• Oıyn-saýyq, sporttyq jáne basqa da buqaralyq is-sharalardy, onyń ishinde jańa jyldyq erteńgilikterdi, korporatıvterdi jáne toılaýǵa arnalǵan  basqa da oryndarda ótkizýge tyıym salyndy.

Karantın jáne shekteý sharalary buzylǵan jaǵdaıda nysandardyń qyzmeti toqtatylady.

Qaraǵandy oblysynyń bas sanıtar dárigeri Iýrıı Zalygın 2020 jylǵy 17 qazandaǵy N39 qaýlysyna ózgerister engizdi.

Qaýlyǵa sáıkes:

• buqaralyq is-sharalardy (mádenı, oıyn-saýyq, konferensııa, semınar, forým, kórmeler sondaı-aq otbasylyq is-sharalar t.b) ótkizýge tyıym salynady;
• Saýda oıyn-ortalyqtary jáne qoǵamdyq tamaqtaný oryndarynda adam sany 50-den aspaı, 1 kelýshige 4 sh.m saqtaýy tıis;
• Qoǵamdyq tamaqtaný obektileriniń tamaqty jetkizý men alyp ketý boıynsha jumys isteýine ýaqyt shekteýinsiz ruqsat etiledi;

Qaýly 2020 jylǵy 25 jeltoqsan saǵat 00:00-den bastap kúshine enedi.

Aqtóbe oblysynyń bas sanıtar dárigeri N. A. Berkimbaevanyń karantın sharalaryna qatysty jańa qaýlysy 2020 jyldyń 24 jeltoqsanynan bastap kúshine enedi.

Qaýly boıynsha:

• áleýmettik qashyqtyqty, maska rejımin saqtaı otyryp, ashyq aýadaǵy  muz aıdyndardyń jumys isteýine ruqsat beriledi;
• ónerkásiptik jáne barlyq qyzmet túrlerindegi óndiristik kásiporyndardyń jumysyna, onyń ishinde vahtalyq ádispen jumys isteıtinder, ashyq aýadaǵy qurylys jumystarynyń, aýyl jáne balyq sharýashylyǵynyń, mal sharýashylyǵynyń qyzmeti ishki tártibine sáıkes ruqsat etiledi;
• azyq-túlik dúkenderi, shaǵyn marketter, sýpermarketter, gıpermarketterdiń qyzmetine ruqsat etiledi; 
• jetkizý boıynsha qyzmetter kórsetýge ruqsat etiledi.

Qostanaı ​​oblysynyń bas sanıtar dárigeri V. Nechıtaılo karantın talaptaryna birqatar ózgerister engizdi.

"Dinı obektilerdiń (meshitter, shirkeýler, soborlar, sınagogalar jáne t. b.) qyzmetine jeke-jeke, bir adamǵa keminde 4 sh.m. esebinen, ujymdyq is-sharalar ótkizbeı, 30%-dan aspaıtyn toltyrýmen jáne olarda ornalasqan qoǵamdyq tamaqtaný obektileriniń jumysyna tyıym salýmen, QR BMSD №57 qaýlysynyń talaptaryn saqtaı otyryp ruqsat beriledi" delingen qaýlyda.

Osy qaýly 2020 jyldyń 25 jeltoqsany saǵat 00:00-den 2021 jyldyń 06 qańtary saǵat 24:00-ge deıin qoldanylady.

Sondaı-aq Mańǵystaý oblysynyń bas sanıtar dárigeri G.Nadýev koronavırýs ınfeksııasynyń aldyn alý týraly qaýlysyna  kelesideı tolyqtyrýlar men ózgerister engizdi:

• konferensııalar, kórmeler, forýmdar, oıyn-saýyq, sondaı-aq adamdar kóp jınalatyn otbasylyq, saltanatty, estelik jáne basqa da is-sharalardy ótkizýge tyıym salynady; 
• Kınoteatrlar 10:00-den 22:00-ge deıin tolymdylyǵy 30%-dan aspaı jumys isteýge tıis;
• Saýda obektileri 10:00-den 22:00-ge deıin jumys isteýine ruqsat etiledi; 
• Shtatta 30-dan astam qyzmetker bolǵan jaǵdaıda qyzmetkerlerdiń 70%-y qashyqtan jumys isteý rejımine aýystyrylady.