Kýrsant qaıtys bolǵan akademııanyń bastyǵy qyzmetinen bosatyldy

Maqan Esbolatov atyndaǵy Almaty IIM akademııasynyń kýrsanty Salamat О́tegenovtiń qaza bolýyna baılanysty, Almaty qalasynyń polısııa departamenti QR QK 105-baby "О́zin-ózi óltirýge deıin jetkizý" boıynsha sotqa deıingi tergeý júrgizýde, onyń barysynda qaza tapqan adamnyń týystary baıandaǵan barlyq dálelder tekseriledi, dep habarlady  Ishki ister mınıstrliginiń baspasóz qyzmeti.

Oqý ornyna Ishki ister mınıstrliginiń kadr saıasaty jáne ózindik qaýipsizdik departamentteriniń basshylyǵy men jaýapty qyzmetkerlerinen arnaıy top jiberildi.

Tekserý qorytyndysy boıynsha IIM-de tártiptik komıssııa otyrysy ótti.

"Ishki ister mınıstriniń buıryǵymen senip tapsyrylǵan bólimshede jumysty uıymdastyrýǵa tıisti baqylaýdyń joqtyǵy úshin atqaryp otyrǵan laýazymdarynan akademııa bastyǵy O.H.Smaıylov bosatyldy, sondaı-aq onyń tárbıe-ıdeologııalyq jáne kadr jumysyna jetekshilik etetin orynbasary bosatýǵa usynyldy. Sonymen qatar, Akademııanyń taǵy 16 jaýapty qyzmetkeri qatań tártiptik jaýapkershilikke tartyldy, olardyń 5-i  atqaryp otyrǵan laýazymdarynan bosatyldy" delingen baspasóz qyzmeti taratqan habarlamada.

Akademııanyń oqý prosesin, turmystyq jaǵdaılaryn, moraldyq-psıhologııalyq ahýalyn, qarjy-sharýashylyq qyzmetin keshendi tekserý taǵaıyndaldy. Oqý ornyna mınıstrliktiń ishki aýdıt, kadr saıasaty jáne ózindik qaýipsizdik departamentteriniń qyzmetkerleri jiberildi.

Vedomstvoda atap ótkendeı, mınıstr Erlan Turǵymbaevtyń tapsyrmasy boıynsha osyndaı tekserýler 2021 jyldyń 1 toqsanynda IIM-niń barlyq oqý oryndarynda júrgiziledi.