Dıdar Hamza Qazaqstan chempıony atandy

Aqtaý qalasynda ótip jatqan dzıýdodan Qazaqstan chempıonatynda Túrkistan  oblysynyń balýany Dıdar Hamza 90 kelige deıingi salmaqta altyn medalge ıe boldy, dep habarlady Túrkistan oblysy ákiminiń baspasóz qyzmeti. 

Chempıonatta top jarǵandar iriktelip, tórtjyldyqtyń basty dodasy, keler jyly ótetin Tokıo olımpıadasynyń lısenzııalyq týrnırlerine qatysa alady.

Elishilik saıysta respýblıka boıynsha myqty balýandar baqtaryn synaýda. Buryn 81 kelide baq synaǵan Dıdar jańa salmaqta jeńiske jetti. Ekinshi oryndy shymkenttik Ersultan Muzapparov ıelense, úshinshi oryndy Aslan Saǵıtbek (Qostanaı oblysy) pen Ádilet Mısın (Aqtóbe oblysy) enshilegen.

Túrkistan oblysynyń dzıý-do kúresinen aǵa jattyqtyrýshysy Serik Qultaevtyń aıtýynsha, erler men áıelder 7 salmaq  boıynsha beldesýde. Ár oblys, qalanyń bapkerleri Qazaqstan chempıonatyna eń úzdik degen shákirtterin alyp kelgen. Boz kilemde beldesip jatqan áıelder arasynda Túrkistan oblysynyń  daryndy  balýany 70 keli salmaqta óner kórsetetin Perızat Jaqypbekova kúmis júldeger atandy.

Sonymen qatar 81 kelidegi jas balýan Nurıdın Eralhan qola júldeger atansa, Moldash Kerimbek úzdik bestikke endi. Búgin erler arasynda 100 keli men odan joǵary salmaqtaǵy balýandar sheberlikterin kórsetedi. Al, áıelder  arasynda 78 jáne +78 den  joǵary burymdy balýandar baqtary men  baptaryn synaıtyn bolady.