Golovkın polshalyq Sheremetany jeńip, jańa rekord ornatty

Orta salmaqta IBF jáne IBO tujyrymdary boıynsha álem chempıony, qazaqstandyq Gennadıı Golovkın kásipqoı rıngtegi 41-shi jeńisine qol jetkizdi. Bul týraly Prosports.kz habarlady. 

Golovkın Hollıvýdta (Florıda shtaty, AQSh) ótken boks keshinde polshalyq Kamıl Sheremetamen qolǵap túıistirdi. Bul kezdesýde Golovkın ózine tıesili tıtýldaryn qorǵady.

Golovkın alǵashqy raýndtan bastap basymdyqty qolyna aldy. Birinshi raýndtyń sońyna qaraı ol polshalyq boksshyny nokdaýnǵa túsirdi. Ekinshi raýndta da bir ret qulatty. Tórtinshi raýndta polıak taǵy da aýyr soqqy alyp, tóreshi esep ashty. Alaıda jekpe-jek 7 raýndta aıaqtaldy. Golovkınniń aýyr soqqysynan keıin polshalyq boksshy 7-raýndta nokdaýnǵa túsken. Keıin kezdesýdi jalǵastyrýdan bas tartty. 

Osylaısha, Golovkın 41-shi jeńisine qol jetkizdi, onyń 36-syn nokaýtpen támamdap otyr. Enshisinde bir teń esep pen bir jeńilis bar.

Qazaqstandyq boksshy bul jekpe-jekten keıin orta salmaqta tıtýl qorǵaý boıynsha rekord ornatty. Buǵan deıin amerıkalyq Bernard Hopkıns álem chempıony tıtýlyn 20 ret qorǵap, rekord qoıǵan edi. Al Golovkın búgin tıtýldaryn 21-ret qorǵap qaldy.

Polshalyq boksshy bolsa, karerasynda alǵash ret qarsylasyna jol berdi. Buǵan deıin Sheremeta 21 jekpe-jek ótkizip, bárin jeńispen aıaqtaǵan. Bes ret nokaýtpen jeńgen bolatyn.