Baıbek: Elbasy jastardyń álemdegi úzdik oqý ordalarynda bilim alýyna jol ashty

«Bolashaq» korporatıvtik qory Qamqorshylyq keńesiniń qurmetti múshesi Baýyrjan Baıbek qazaq tilinde dýblıajdalǵan «Mýlan» fılminiń Almaty qalasynda ótken premerasyna qatysty.

Dısneılik fılmniń aldyn ala kórsetiliminde sóılegen sózinde Baýyrjan Baıbek Qazaqstan Respýblıkasynyń Tuńǵysh Prezıdenti Nursultan Nazarbaevtyń el Táýelsizdigin jarııalaǵan sátten bastap memlekettik tildiń qoldaný aıasyn keńeıtý, bilikti de bilimdi jastardyń qataryn arttyrý, qazaq tilindegi sapaly aqparattyq ónimderdi kóbeıtý sekildi mańyzdy máselelerge erekshe nazar aýdaryp, basymdyq bergenine toqtaldy.

«Osy maqsatta el ekonomıkasy nyǵaıa qoımaǵan kezdiń ózinde 1993 jyly «Bolashaq» baǵdarlamasyn quryp, talapty da daryndy jastardyń álemdegi úzdik oqý ordalarynda bilim alýyna jol ashty. Qazaq mektepteri men balabaqshalarynyń sanyn arttyrdy. Osy baǵyttaǵy júıeli jumystardyń nátıjesinde memlekettik tildiń qoldanylý aıasy keńeıip, mazmundyq bazasy nyǵaıyp keledi. Qazirgi tańda prezıdenttik «Bolashaq» baǵdarlamasy boıynsha bilim alǵan 14 myńǵa jýyq azamat elimizdiń ıgiligi jolynda jemisti qyzmet etip jatyr. Atalǵan baǵdarlama túlekteri qurǵan «Bolashaq» korporatıvtik qory elimizdiń zııatkerlik áleýetin kóterýdi maqsat etken túrli jobalardy iske asyrýda. Solardyń biri – qazaq tilindegi sapaly kontentti kóbeıtýge baǵyttalǵan «О́zińen basta» jobasy», - dedi Baýyrjan Baıbek.

Aıta keteıik, «Bolashaq» korporatıvtik qory bul jobany 2011 jyly qolǵa alyp, Disney kınostýdııasymen yntymaqtastyǵyn bastaǵan bolatyn. Osy jyldar ishinde Qordyń qoldaýymen sheteldik 34 úzdik fılmge dýblıaj jasalyp, sonyń arqasynda qazaq tili Disney stýdııasynyń 39-shy tili jáne Sony Pictures stýdııasynyń 7-shi tili boldy.

«Qordyń bul jobasyna Elbasy arnaıy nazar aýdaryp, qoldaý bildirdi. Búgin osy joba aıasynda qazaq tilinde dýblıajdalǵan Disney stýdııasynyń «Mýlan» fılmi kórermenge usynylyp otyr. Bul – atalǵan qordyń qazaq tiline dýblıajdap, kınoprokatqa shyǵarǵan 35-shi fılmi. Iаǵnı «bolashaqtyqtar» qazaq tilindegi sapaly kontentti kóbeıtýde mol tájirıbe jınap, úlken belesti baǵyndyryp otyr», - degen Baýyrjan Baıbek osy iske atsalysqan azamattarǵa alǵysyn bildirdi.

Sondaı-aq, ol sóziniń sońynda osy joba arqyly otandyq kıno salasy jańa fılmdermen tolyǵyp qana qoımaı, sonymen birge qazaq tilinde dýblıajdaý isi de óristegenin atap ótti. Onyń aıtýynsha, bul baǵyttaǵy jumystar ary qaraı da óz jalǵasyn tabady.