Jetisý jeriniń órkendeýine úles qosqan jandar marapattaldy

Taldyqorǵan qalasyndaǵy Bıken Rımova atyndaǵy oblystyq teatrda saltanatty shara ótip, Jetisý jeriniń órkendeýine úles qosqan jandar marapattaldy.

Sharada sóz alǵan oblys ákimi Amandyq Batalov:

 – Táýelsizdik – babalardyń armany men amanaty, halyqtyń eń kıeli qundylyǵy. Eldiń úkili úmiti men senimi, kúsh-jigeriniń sarqylmas kózi. 2021 jyly rýhy asqaq, tuǵyry bıik elimizdiń Táýelsizdigine 30 jyl tolady. Bul – bizdiń jas memleketimiz úshin úlken tarıhı beles. Osy jyldar ishinde Qazaqstan ózin táýelsiz memleket retinde ornyqtyrdy. Osy ýaqytta túrli qıyndyqtar men synaqtardan óttik. Sonyń bárine Tuńǵysh Prezıdentimiz Nursultan Ábishuly Nazarbaevtyń strategııalyq maqsattarǵa negizdelgen salıqaly saıasatynyń arqasynda jettik, – degen Amandyq Ǵabbasuly jurtshylyqty alańdatqan bıylǵy jyldyń jetistigin saralady.

– Elbasymyz Nursultan Ábishuly: «Bul – ata-babalarymyzdyń asyl armany. Biz Táýelsizdikti babalar naqylymen, halyqtyń parasatty aqylymen aldyq. Otandy súıý – erekshe baqyt. Al, onyń ystyǵyna kúıip, azabyna shydaý – árkimge buıyra bermeıtin bólek dúnıe» degen bolatyn. Bizdiń Táýelsizdik tarıhynyń ár paraǵynda Elbasymyzdyń ushan-teńiz eńbegi, jankeshti erligi, jasampaz isteri jatyr. Qazaq elin tórtkúl dúnıege áıgilep, barsha álemge moıyndata bildi. Nursultan Ábishulynyń reformatorlyq batyl sheshimderiniń arqasynda jańa Qazaqstannyń jasampaz dáýirine jol ashyldy. Ata Zańymyz jazylyp, tól teńgemiz aınalymǵa endi, shegaramyz bekidi, asqaq astanamyz boı kóterdi, halyqaralyq uıymdarǵa tóraǵalyq ettik. Ekonomıkanyń san salalaryn qamtıtyn mańyzdy baǵdarlamalar qabyldanyp, tarıh úshin uly ister jasaldy. Táýelsizdik kezeńiniń tájirıbesi jınaqtaldy. Búginde Prezıdent Qasym-Jomart Kemeluly Toqaevtyń baısaldy saıasaty Elbasynyń syndarly jolymen jalǵasyp jatyr.

Qazaqstan damyǵan 30 eldiń qataryna enýdi maqsat etip, jańǵyrý jolynda qadam basyp keledi. Táýelsizdik jyldarynda jetken jetistikterde jetisýlyqtardyń da qosqan úlesi mol. Jetisý jerinde qant qyzylshasyn ósirý qaıta jańǵyrtylyp, sýarý júıeleri qalpyna keltirilgenin, et jáne sút óńdeý isiniń jolǵa qoıylyp, ınvestısııalyq iri jobalardyń júzege asyrylyp otyrǵanyn, óńirdiń barlyq aýyldyq okrýgterine tabıǵı gaz tartylyp, respýblıkalyq avtokólik joldarynyń jóndelip jatqanyn tilge tıek etken oblys ákimi bıyl ónerkásip óniminiń kólemi 1 trıllıon teńgeden asatynyn, aýylsharýashylyq óniminiń mólsheri 900 mıllıard teńgege jetetinin atap ótti.

Odan soń memlekettik jáne qoǵamdyq qyzmette erekshelengen, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa eleýli úles qosqan jandar «Qurmet» ordenimen, III dárejeli Eńbek dańqy ordenimen, «Eren eńbegi úshin» medalimen, «Shapaǵat» medalimen, Qazaqstan Respýblıkasynyń Qurmet gramotasymen marapattalyp, kópshiliktiń yqylasyna bólendi.

Qurmet» ordenin alǵandardyń qatarynda oblys ákimi baspasóz qyzmetiniń basshysy Aıdar Bashbaev bar. Sondaı-aq, oblystyq ardagerler keńesiniń tóraǵasy Ermek Kelemseıit, oblystyq máslıhat hatshysynyń mindetin atqarýshy Serik Muqanov, «Almaty boıaýlary» JShS-niń dırektory Rımma Salyqova QR Prezıdentiniń Qurmet gramotasymen marapattalsa, QR Parlamenti Senatynyń depýtaty Lázzat Súleımen, eńbek ardageri Eleýsiz Sultanǵazıev, «Aınalaıyn» balalar úıiniń ádiskeri Nesipjamal Baımadıeva, «Aıý Tas» JShS-niń quryltaıshysy Alpysbaı Rahımov, kınorejısser Talǵat Temenov, «ZHERSU» ınvestısııalyq- -óndiristik korporasııasy baqylaý keńesiniń tóraǵasy Baýyrjan Ospanov «Almaty oblysynyń Qurmetti azamaty» ataǵyn ıelendi.

Jetisýlyqtar úshin taǵy bir qýanyshty jaıt, oblysymyzdyń ákimi Amandyq Ǵabbasuly Batalov Táýelsizdik kúni qarsańynda Nursultan Ábishuly Nazarbaevtyń qolynan "Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev" ordenin aldy. QR Parlamenti Senatynyń depýtaty Lázzat Súleımen, kınorejısser Talǵat Temenov, «Aınalaıyn» balalar úıiniń ádiskeri Nesipjamal Baımadıeva, «Hılnıchenko ı K» kommandıttik seriktestiginiń tóraǵasy Vıktor Hılnıchenko, «Almaty boıaýlary» JShS-niń dırektory Rımma Salyqova kópshilikke rızashylyq bildirip, júrekjardy tilekterin jetkizdi.