Ońdasyn Orazalın: Elimizdiń Táýelsizdigi - Ult Kóshbasshysynyń eńbegi

Aqtóbe oblysynyń ákimi Ońdasyn Orazalın Qazaqstan Respýblıkasynyń Táýelsizdigi kúnine arnalǵan saltanatty sharaǵa qatysyp, jıynǵa qatysýshylardy ulttyq merekemiz – Táýelsizdik kúnimen quttyqtady.
Táýelsizdiktiń 29 jyl ishinde elimizdiń jetken jetistikterine toqtaldy.
“Táýelsizdik jaıly oı tolǵasaq, tebirenbeı aıtý múmkin emes. Táýelsizdik- taǵdyrdyń bizge tartqan teńdessiz syıy. Kezinde qysqa jip kúrmeýge kelmeı, qordalanyp qalǵan máselelerimiz az emes edi. Temir jol boıyndaǵy táýeldilikten arylý úshin tóteden jol tarttyq. Tórtkúl dúnıemen áýe qatynastary qalyptasty. Azııa men Eýropanyń arasyndaǵy altyn kópir bolyp halyqaralyq dárejedegi avtomobıl joldarymen dáliz ótkizdik. Elordamyzdy jańalap, Uly dala tórinen oıyp turyp jańa qala saldyq. Ozyq elderdiń bilimi men tájirıbesin úırený úshin “Bolashaqty” baǵdarlap jol ashyp berdik. Egemen eldiń talabyna saı atrıbýttarymyz tolyqtaı jetkilikti. Eldi qorǵaıtyn aıbyndy áskerimiz, halyqtyń qaýipsizdigi men turǵyndardyń tynyshtyǵyna jaýapty quqyq qorǵaý organdary, halyqtyń muń-muqtajyn óteýshi memlekettik qyzmet, barlyǵy da álemdik standartqa saı. Shekaramyzdy shegendep, el irgesin bekittik. Munyń barlyǵy táýelsizdiktiń arqasynda keldi. Ult kóshbasshysy, Tuńǵysh Prezıdent, Elbasymyz N.Á. Nazarbaevtyń kóregendigimen, tabandy saıasatynyń jemisi men eńbegi. Búgingi kúni ekonomıkamyz nyǵaıyp, halyqtyń ál-aýqaty jaqsardy. Ol jetistikterimiz qalalarda ǵana emes, shalǵaı jatqan aýyldarymyzdan da kórinis berýde. Qala turǵyndary tutynatyn barsha qyzmet aýyl turǵyndaryna da qoljetimdi boldy. О́lkemizde munaı men birge ilespe gaz da óndiriledi. О́kinishke qaraı, egemendik alǵanǵa deıin sol gazdy fakeldermen aýaǵa beker jaǵyp ysyrap qylǵan edi. Irgesinde otyrǵan aýyl turǵyndary kómir jaǵyp kúl shyǵarýǵa májbúr boldy. О́z aldymyzǵa el bolyp, esimizdi jıǵan soń, áýeli tabıǵattyń bizge bergen osy nyǵmetin el ıgiligine jaratýǵa áreketter jasaldy. Eldiń egemendigi, jerdiń bútindigi ata- babalarymyzdyń san ǵasyrlyq asyl armany, keleshek urpaqqa amanaty. Ulyq merekemiz qutty bolsyn”,- dedi Ońdasyn Orazalın.
Aımaq basshysy oblys damýyna qosqan úlesteri men, talmaı sińirgen eńbekteri úshin 72 azamatqa túrli dárejedegi marapatty tabystady. Aldymen qyzmettik mindetin atqarý kezinde marqum bolǵan Áýe qorǵanysy kúshteri Áskerı ınstıtýty materıaldyq – tehnıkalyq qamtamasyz etý batalonynyń aǵa mamany, kishi serjant III dárejeli «Aıbyn» ordenimen Talǵat Nurǵalıevtiń marapaty anasyna tabystaldy. «Parasat» ordenimen “Geobazıs” JShS bas dırektorynyń keńesshisi Málik Jekeev, «Erligi úshin» medalimen Aýǵan soǵysynyń ardageri «Arnaıy qyzmet - Qandyaǵash» JShS dırektory Roman Tasqynbaev, sondaı- aq, III dárejeli «Eńbek Dańqy» ordenimen 4 azamat- «SNPS-Aqtóbemunaıgaz» basqarmasy elektrmen jabdyqtaý sehynyń VI razrıadty elektr jabdyqtaryn jóndeý jáne qyzmet kórsetý jónindegi elektr monteri Nurlybek Ábishev, «Kazhrom» trans ulttyq kompanııasy» aksıonerlik qoǵamy fılıaly Dóń taý-ken baıytý kombınaty «Dóń» kenishi «Gornyı» ýchaskesiniń ekskavator mashınısi Iýrıı Kalınchev, «Aqtobesu - energygroup» aksıonerlik qoǵamynyń mehanık – jóndeýshisi Oleg Kobylkın, «Energosıstema» JShS Oıyl elektr jelileri ýchaskesiniń IV razrıadty elektromonter-traktorshysy Erbolat Qonaevtar marapattalsa, «Qurmet» ordenimen 10 azamat, «Eren eńbegi úshin» medalimen 21 azamat, «Shapaǵat» medalimen 9 azamat, QR Qurmet gramotasy 7 azamatqa, QR Prezıdentiniń Qurmet gramotasy 3 azamatqa tabystalsa, «Aqtóbe oblysynyń Qurmetti azamaty» ataǵy 5 azamatqa berildi. Jáne Aqtóbe oblysy ákiminiń «Oblysqa sińirgen eńbegi úshin» tósbelgisimen 9 azamat marapattaldy.