Qasym-Jomart Kemeluly! «Qandastarymyzdy» keri qaıtarýdy toqtatýdy suraımyz! (vıdeo)

Qurmetti Qasym-Jomart Kemeluly!

Táýelsizdikten keıin Elbasy Nursultan Ábishuly bastaǵan Qazaq kóshi múldem toqtady dep aıtýǵa bolady. Qazirgi ýaqytta tar jol, taıǵaq keshýdi basyp kelgen shetel qazaǵy óz Otanynyń shekarasynan óte almaı keri qaıtyp jatyr. Buǵan tek álemdi jaýlaǵan pandemııa áser etip otyr desek qatelesemiz. Sizge túsinikti bolýy úshin qysqa ǵana jazýdy jón kórip otyrmyn.

• О́zińiz jaqsy biletin Qytaı eli zańdy buzǵan, sottalǵan azamattarǵa shetel asýǵa arnalǵan pasport bermeıdi.
• Qazaq eliniń Qytaıda ornalasqan vızalyq qyzmeti de Qazaqstanda zań buzǵan nemese kirýge tyıym salǵan azamattarǵa vıza bermeıdi.
• Arnaıy zerthanalar Covid-19 synaǵynda oń nátıje kórsetkenderge PSR testin teris nátıjemen bermek túgili sol ýaqytta karantınge jatqyzyp nemese arnaýly emhanalarǵa ornalastyrady.

Endeshe, qolynda Qytaıdyń zańdy pasporty, Qazaqstannyń zańdy vızasy, PSR testi teris nátıjesiniń anyqtamasy bola tura Qazaq shekarasynan kire almaǵan shetel qazaǵyna ne betimizben jaýap bermekpiz?! Estýimizshe, Otanyna oralǵysy kelgen qazaq vedomstvoaralyq komıssııanyń bekitken «arnaıy tizimine» enýi kerek eken. Ol qandaı komıssııa? Ol qandaı tizim? Túsindiretin bir pende joq.

Bizdiń anyqtaýymyzsha, buǵan premer-mınıstrdiń orynbasary jaýapty kórinedi. Tipti shekaradan kirýge ruqsat beretin tizimge kirýge kómek kórsetetin deldaldardyń baryn qulaǵymyz shaldy. Basqasy basqa osynaý qıyn qystaý kezeńde óz Otanyna oralǵysy kelgen, ózińiz «Qandas» dep ataýǵa pármen bergen baýyrlarymyzdyń shekaradan óte almaýy álem aldynda masqaralyq emes pe?! Keshe ǵana Qazaq shekarasynan keri qaıtqan qazaqtar máselesi týraly «Qamshy» portaly arnaıy maqala jarııalap, Dúnıejúzi qazaqtary qaýymdastyǵy – «Otandastar qorynyń» aralasýymen olardyń qaıta oralýyna muryndyq bolǵan edi. Qıyndyqqa ushyraǵan azamattyń týysynan estýimizshe, Qytaı tarapy olardyń ózderine eskertý jasapty. «Biz qolyna zańdy pasport berdik, vızasy boıynsha shekaradan shyǵardyq. Qabyldamaı qoıǵan óz Otandaryńyz. Endeshe nege Qytaı tarapyn kinálaý sıpatyndaǵy maqala jarııalanǵan» dep óz pikirlerin aıtypty. Oryndy. Aıtarǵa sóz joq. Sondaı-aq atalǵan maqala shyǵysymen redaksııaǵa AQSh-tyń Almatydaǵy konsýldyǵynan habarlasyp, Qazaqstan shekarashylary keri qaıtaryp jibergen qandastar týraly aqparat surady. Demek óz ishimizde-aq yń-shyńsyz retteýge bolatyn jaǵdaıdyń shýy Qytaı men Amerıkaǵa deıin jetýine jol berip qoıdyq. Bul – eldigimizge, memlekettigimizge syn!

Prezıdent Qasym-Jomart Kemeluly!

Qytaıdaǵy qazirgi jaǵdaıdy bizden góri Siz artyq bilesiz desek qatelespespiz. Sońǵy 2-3 jylda Qazaq kóshi turalap, oǵan álemdik pandemııa qosylyp, ásirese Qytaı qazaǵynyń Otanyna oralýy múldem múmkin emes jaǵdaıǵa jetti. Bólinip-jarylǵan týys týǵandar, erli-zaıyptylar, úılenbekshi bolǵan jastar eki jaqta qalyp, beıbit zamannyń tarshylyǵyn tartyp otyr. Osyndaı qıyn kezeńde 3-4 memlekettiń shekarasyn attap, áreń degende Otan topyraǵyn bastym-aý degende bizdiń shekarashylar keýdesinen ıterip keri qaıtarýdy ádetke aınaldyrdy. Qandastarymyzdyń birneshe memleketti attap, Otanyna áreń oralǵanyn, olardy keri qaıtarǵanda Qytaıda ne kútip turǵanyn bizdiń shekara qyzmeti múldem qaperine almaıdy.

Qurmetti Qasym-Jomart Kemeluly!

Táýelsizdikten keıingi «Qazaq kóshi» Elbasy Nursultan Nazarbaevtyń álem aldyndaǵy, tarıh aldyndaǵy «Ult kóshbasshysy» retinde jasaǵan eń uly eńbegi desek artyq aıtqandyq bolmas. Al sol «Uly kóshtiń» eldi Siz basqarǵan kezeńde Dúnıejúzine «masqara» bolatyn deńgeıde turalap qalýyn búkil qazaq qalamaıtyny anyq. Shekara qyzmetiniń generaly Darhan Dılmanov myrzanyń osy máselede keıbir túıtkildiń sheshilýine oń yqpal etip otyrǵanynan habardarmyz. Degenmen bul bir qazaqtyń ǵana emes barsha Alash jurtyn alańdatatyn máselege aınalǵany anyq. Sondyqtan osy máseleni ózińiz tikeleı baqylaýyńyzǵa alyp, túbegeıli oń sheshilýine yqpal etýińizdi suraımyz!

Osy hatty tek «Qamshy» portalynda ǵana emes, prezıdent ákimshiligine resmı joldaıtynymyzdy jáne resmı jaýap kútetinimizdi habarlaımyz.

Qurmetpen, «Qamshy» aqparat agenttiginiń jetekshisi Bilál Qýanysh