"Almaty" arnasynda "DiNaZaur" telehıkaıasy kórermen nazaryna usynylady

"Almaty" arnasy kórermenderin taǵy bir komedııa janryndaǵy týyndymen qýantpaq, dep habarlaıdy Qamshy.kz.

Syrlas, muńdas úsh qurby aınalasyndaǵy oqıǵalar tóńireginde órbıtin "DiNaZaur" telehıkaıasy jaqynda kórermender nazaryna usynylmaq.

Basty rólderdiń birin kıno jáne teatr aktrısasy Janargúl Janyamanova somdaıdy.

Búginge deıin ol birneshe serıalǵa túsip, teatr aktrısasy  retinde de tanylǵan. Úsh balanyń anasy, akter Rústem Janyamanovtyń jary.

Jańa týyndydaǵy róli jaıly Janargúl Janyamanovamen suhbattasý sáti buıyrdy.

Telehıkaıadaǵy Dınara, Nazym jáne Záýre – naǵyz dostar. Olar bala kezden birge ósken. Er balalar olardy «DiNaZaur»  dep mazaqtaıtyn. Bir kúni úsh qurby muny toqtatýǵa sheshim qabyldap, buzaqyny jazalaıdy. Sodan keıin Záýre, Nazym men Dınara bir-birine eshqashan renjimeıtinin aıtyp, serttesedi. Osy jyldar ishinde qyzdardyń dostyǵy nyǵaıa túsedi. Telehıkaıadaǵy sıýjet jelisi osylaı bastalady. Janargúldiń aıtýynsha, úsh qurby ómirde de dos. Ajarlym Maǵzummen (Nazym) óner ordasynda birge oqysa, Ulbolsyn Shalqarovamen (Záýre) buǵan deıin de túsirilim alańynda kezdesken. Telehıkaıadaǵy keıipkerler ómirde de shynaıy dos ekenin aıtady. "Qyzdarda shynaıy dostyq bolmaıdy" degen tujyrym da bar, alaıda bul telehıkaıada, kerisinshe, qyzdardyń shynaıy dostyǵy týraly aıtady.  

Janargúl Janyamanova:

– Biz ómirde de qurbymyz. Bir-birimizge uqsaımyz. Ajarlymen bir topta oqydyq. Turmysqa shyqqan kezde qyz joldas bolǵan. Jaqyn dostaryńmen túsirilim alańdarynda bolýy qýanyshty jaǵdaı, árıne. Ulbolsynmen burynnan tanyspyz. Osyǵan deıin otandyq telehıkaıada birge tústik. Túsirilim barysynda qandaı da bir qıyndyq bolmady. Erkin oınap shyqtyq rólimizdi.  Bir-birimizge óte jaqynbyz, «ansambl» bola bildik dep aıtsam bolady.

Janargúldiń keıipkeri Dınara. Turmysqa shyqqan, úsh balasy bar. Kúndelikti kúıbeń tirshilik pen úı sharýasynan ózine kóńil bóletin ýaqyty joq. Balardyń tárbıesi, úı sharýasy, tamaq daıyndaý, kir jýý t.b. Qazirgi ómirindegi qıyndyqtarǵa qaramastan, ol óz ómirine shaǵymdanbaıdy, kerisinshe baqytty. О́ıtkeni ómirdegi eń qymbat dúnıe otbasy dep túsinedi. Janargúl telehıkaıadaǵy óz rólin úıde otyrǵan kelinshekterge bir paıdasy tıer dep oılaıdy.

Janargúl Janyamanova:

–  Meniń keıipkerim – Dınara. Bala-shaǵamen úıde otyrǵan, kúndelikti úıdiń sharýasynan sharshaǵan áıeldiń obrazy. Kúıeýi tańerteńnen keshke deıin jumysta. Kúıeýiniń nazaryn aýdarý úshin neshe túrli qylyqty oılap tabady. Osy jerde úsh balamen otyrýy meniń ómirime uqsas. Biraq basqa serıaldaǵy rólderime esh uqsamaıdy. Sol úshin maǵan qyzyq boldy. Qandaı syn, qandaı pikir aıtylady eken dep kútip júrmin. Tipti, qobaljyp júrmin desem bolady.

Janargúl búginge deıin drama, tragedııa janrynda oınaǵandyqtan, jańa telehıkaıadaǵy keıbir oqıǵalardan jatsynǵanyn aıtady. Onyń aıtýynsha, komedııa janryndaǵy teleserıalǵa alǵash ret túsken.

Janargúl Janyamanova:

– Komedııa janrynda alǵash ret tústim. Búginge deıin basqa serıalda, teatrda drama, tragedııa janrynda oınadym. Drama aktrısasy dep tanyldym. «DiNaZaur» telehıkaıasy komedııa bolǵandyqtan, keıbir sahnalardy birinshi ret oınadym. Halyq meniń sulý obrazyma úırengen. Myna serıalda jat qylyq jasaımyn, soǵan qalaı qaraıdy eken dep oılaımyn. Basynda eshqashan jarnama jasamaımyn dep ýáde bergenmin. Eshkim kórmese eken dep tiledim. Sosyn telefonǵa túsirip alyp, kúıeýime kórsettim. Kúıeýim akterdiń kez kelgen oıynyna  kásibı túrde qaraıdy. Kerisinshe keńesin, aqylyn aıtyp otyrady. Myna róldi aldyn ala aıtýyń kerek edi, bálkim, jaqsylap shyǵýyna kómekteser edim dep qýantyp qoıdy.

Janargúldiń telehıkaıadaǵy juby akter – Qaırat Ádilgereı. Túsirilim basynda sál qıyndyq bolǵan. Degenmen úırenisip kettik deıdi Janargúl.

–  Qaırat óz isiniń mamany, naǵyz akter. Ol kisiden kóp nárse úırendim. Osyndaı deńgeıdegi aktermen jumys istegenime alǵysym sheksiz. Tek jup qana emes ustaz bola bildi. 

Shytyrman oqıǵaǵa toly  úsh qurby jaıynda "DiNaZaur" telehıkaıasy 14 jeltoqsannan bastap "Almaty" arnasynyń efırinen kórsetiledi.