1 qańtardan bastap kimderdiń jalaqysy kóteriledi? Mınıstrlik jaýap berdi

Qazaqstanda 2021 jyldyń 1 qańtarynan bastap memlekettik uıymdardyń 38,5 myńnan astam áleýmettik qyzmetkeriniń jalaqysy ósedi. Bul týraly eńbek jáne halyqty áleýmettik qorǵaý mınıstrligi habarlady.

Mınıstrliktiń málimetinshe, bul maqsatqa respýblıkalyq bıýdjetten aldaǵy úsh jylǵa shamamen 95 mlrd teńge bólinedi. 2021 jyldyń 1 qańtarynan bastap laýazymdyq jalaqyny ulǵaıtý jolymen áleýmettik qyzmetkerler úshin jalaqy 1,5 esege, 2022 jyldyń 1 qańtarynan bastap aǵymdaǵy mánnen 1,75 esege, al 2023 jyly 2 esege ósedi.

"Jalaqyny kóterý óz qyzmetin stasıonarlyq (qarttar men múgedekterge arnalǵan úıler) jáne jartylaı stasıonarlyq úlgidegi medısınalyq-áleýmettik mekemelerde (budan ári – MÁM) (kúndiz bolý bólimsheleri, ońaltý ortalyqtary), ýaqytsha bolý mekemelerinde (belgili bir turǵylyqty jeri joq adamdarǵa, turmystyq zorlyq – zombylyq qurbandaryna arnalǵan ońaltý ortalyqtary) júzege asyratyn negizgi personal (áleýmettik qyzmetkerler) men basshy quramǵa, sondaı-aq úıde qyzmet kórsetetin áleýmettik qyzmetkerlerge qatysty bolady" delingen mınıstrlik taratqan habarlamada.

Sonymen qatar, MÁM ákimshilik jáne kómekshi qyzmetkerleriniń jalaqysyn laýazymdyq jalaqyǵa qosymsha aqyny 30-dan 40%-ǵa deıin arttyrý arqyly kóterý josparlanýda.

– Bul jyl barlyǵyna qıyn boldy. Bizdiń áleýmettik qyzmetkerler mekemelerde is júzinde turdy, erekshe kontıngentpen jumys jasady. Biz olardyń eńbegin baǵalaımyz jáne olardyń mańyzdylyǵyn túsinemiz. Bul shara áleýmettik salaǵa mamandardy tartýǵa, qyzmetkerlerdiń tapshylyǵyn azaıtýǵa jáne kadrlyq jaǵdaıdy turaqtandyrýǵa múmkindik beredi dep úmittenemiz, – dedi eńbek jáne halyqty áleýmettik qorǵaý mınıstri Birjan Nurymbetov.