Foto: «Nur Otan» partııasynyń baspasóz qyzmeti

«Nur Otan» partııasynyń Ortalyq apparatynda beınekonferensııa baılanysy rejıminde Respýblıkalyq saılaýaldy shtabtyń birinshi otyrysy ótti. Shtab quramyna qoǵamdyq pikir kóshbasshylary, partııa belsendileri men partııalyq tizimge engen kandıdattar qatarynan 400-den astam adam kirdi.

«Nur Otan» partııasynyń Respýblıkalyq saılaýaldy shtabynyń basshysy Baýyrjan Baıbek atap ótkendeı, 216 óńirlik saılaýaldy shtab jumysyna elimizdiń 7 myńdaı belgili de bedeldi azamattary jumyldyrylǵan. Bulardyń qatarynda praımerız jeńimpazdary, qoǵam qaıratkerleri, qyzmettegi depýttar jáne basqalar bar. Olardyń árqaısysyna arnap jeke úgit-nasıhat jospary jáne saılaýshylarmen kezdesý kestesi ázirlengen.

«Elbasy, partııa Lıderi Nursultan Nazarbaev tapsyrǵandaı, úgit-nasıhat naýqany aıasynda biz saılaýshylardy 100% qamtýǵa tıispiz. Bul úshin barsha partııalastar, ásirese, kandıdattar saılaý naýqanyna belsene atsalysýy kerek. Pandemııany eskere otyryp, qarqyndy da naqtylanǵan jumys júrgizý mańyzdy. Biz buqaralyq is-sharalardan naqty baǵdarlanǵan jıyndarǵa kóshemiz. Naqty áleýmettik toptar – zeınetkerler, jumysshylar, agrarshylar, muǵalimder jáne dárigerlermen kezdesemiz. Olardy tolǵandyrǵan máselelerdi jan-jaqty talqylap, saılaýaldy baǵdarlamada kórsetilgen máselelerdiń naqty sheshimin árbir saılaýshyǵa qarapaıym ári túsinikti tilde jetkizý qajet. Shalǵaı aýyldarǵa deıin barý kerek. Prezıdent Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyra otyryp, biz kópshiliktiń máselesin tyńdap qana qoımaı, olardy sheshýimiz kerek. Biz partııa men qoǵam arasyndaǵy keri baılanysty nyǵaıtyp, azamattardyń talap-tilekterin jınaýǵa tıispiz. Úgit-nasıhat naýqanymyzdyń basty qaǵıdasy – turǵyndarmen tikeleı jáne shynaıy dıalog ornatýǵa negizdeledi», – dep atap kórsetti Baýyrjan Baıbek.

«Nur Otan» partııasynyń baspasóz qyzmeti

Sonymen, tek Respýblıkalyq saılaýaldy shtab aıasynda ǵana 35 qala men 82 aýdanda 300-den astam is-shara ótkiziledi. Oblystarda, qalalar men aýdandarda barlyq 6,4 myń kandıdat saılaýshylarmen kezdesedi. Onlaın-tehnologııalardy eskersek, jalpy is-sharalar keminde 9 mıllıonnan astam qazaqstandyqty qamtıdy.

«Jyl boıy biz óńirlerge baryp, turǵyndarmen kezdestik, áleýmettik zertteýler júrgizdik, sarapshylarmen keńesip otyrdyq. «Nur Otan»-nyń qoǵamdyq qabyldaý bólmelerine túsken barlyq ótinishterge taldaý júrgizildi. Praımerız barysynda kandıdattarymyz azamattardyń 17 myńnan astam ótinishin jınady. Solardyń negizinde biz barlyq áleýmettik toptardyń múddesin qamtıtyn 250-den astam naqty ındıkatordy anyqtadyq», – dep atap ótti Baýyrjan Baıbek.

Partııa baspasóz qyzmetiniń málimetinshe, búgin nurotan2021.kz arnaıy saıty iske qosylyp, onda barlyq saılaýaldy baǵdarlama men partııalyq tizimder jarııalanǵan.

«Búkil álemde jáne elimizde pandemııa jalǵasýda. Ońaı bolady dep eshkim de ýáde bere almaıdy. Áıtse de, biz árqashan kúsh biriktire otyryp, kez kelgen daǵdarysty eńserip kelemiz. Bizdiń saılaý naýqanynyń basty urany – Qıyndyqtardy eńserip, jeńiske birge jetemiz! Birlik pen yntymaqtyń arqasynda biz bir komanda retinde kez kelgen bıikti baǵyndyra alatynymyzǵa senimdimin», – dep túıindedi ol.

 

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir