09 Jeltoqsan, 2020 NEWS
Foto: Otandastar qorynyń facebook paraqshasynan
Qamshy portaly kótergen másele oń sheshimin tapty. 6 jeltoqsan kúni saıtymyzda "Qazaq shekarasynan qazaqtar ǵana kire almaı jatyr" degen atpen maqala jarııalanǵan. Maqalada Almaty halyqaralyq áýejaıyna qonǵan etnıkalyq qazaqty (Qytaı azamaty) vızasynyń, PSR testtiń teris nátıjesi baryna qaramastan el aýmaǵyna kirgizbeı, sebebin túsindirmesten keri qaıtarǵany habarlanǵan. Araǵa eki kún salǵanda túıitkil túıini tarqatylyp, qandasymyz tarıhı otanyna keldi, dep habarlaıdy Qamshy portaly "Otandastar qoryna" silteme jasap.
"Súıinshi! Qandasymyz Rıza Aqanqyzynyń máselesi sheshildi
Bıyl 6 jeltoqsan kúni Qamshy.kz saıtynda "Qazaq shekarasynan tek qazaqtar ǵana kire almaı jatyr" atty maqala jarııalanǵan bolatyn. Maqalada Qytaıdan tikeleı áýe reısi bolmaǵandyqtan, birneshe eldi basyp, sońynda Dýbaı arqyly Qazaqstanǵa jetip, keıinnen keri qaıtarylǵan qandasymyz Rıza Aqanqyzy týraly aıtylady.
"Otandastar qory" bul másele jóninde saıt redaksııasymen baılanysqa shyǵyp, elge kire almaǵan Rıza qaryndasymyz týraly aqparatty aldy. Shuǵyl QR UQK-niń Shekara qyzmetine suraý salyp, atalǵan qandasymyzǵa kómek kórsetý amaldaryn qolǵa aldy. Mine, 48 saǵattan keıin túıtkildi másele oń sheshimin tapty.
"Otandastar qory" bolashaqta da osyndaı jaǵdaıdyń oryn alýyna jol bermeý úshin mundaı máselelerdi sheshý tetikterin usynyp, QR Aqparat jáne qoǵamdyq damý mınıstrligi arqyly tıisti Vedomstvoaralyq komıssııaǵa arnaıy hat joldady.
"Ár qazaq meniń jalǵyzym" degendeı qandasymyzǵa baılanysty qalyptasqan túıtkildi jaǵdaıdy sheshýge atsalysqan Shekara qyzmetiniń dırektory general D.Dılmanov myrza men qyzmetkerlerine jáne ultjandy tulǵa, Parlament Senatynyń depýtaty Murat Baqtııarulyna, sondaı-aq máseleni der kezinde kótergen Qamshy.kz saıty ujymyna, basqa da kómek qolyn sozyp, máseleniń sheshilýine tikeleı jany ashyp, at salysqan barlyq azamattarǵa "Otandastar qory" atynan alǵysymyzdy jetkizemiz!" delingen qor taratqan aqparattyq habarlamada.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir