«Biz árqaısysymyz osylaı bir ǵana betperde rejımin saqtaı otyryp, koronavırýs pandemııasyn birge jeńemiz dep oılaımyn» — almatylyq fotokórme qatysýshysy COVID-19 qarsy

Almaty qalasynda qala ákimdiginiń qoldaýymen О́ńirlik kommýnıkasııalar qyzmetiniń uıymdastyrýymen fotokórme ótýde. Fotokórmede qala turǵyndarynyń jumystary qoıylǵan.

Sharanyń basty maqsaty — koronavırýstyń bolýy yqtımal jańa tolqyny qarsańynda sanıtarlyq talaptardy, ásirese maska taǵý rejımin ustanýdyń mańyzdylyǵyn, pandemııamen kúreste aldyńǵy shepten tabylatyn jandardyń (medısına qyzmetkerleri, epıdemıologtar, polısııa, eriktiler jáne t. b.) jumysynyń qundylyǵyn turǵyndardyń esine salý.

Osy maqsatta kórmege jumysyn usynǵan «Qazaq gazetteri» portalynyń redaktory Dosjan Balabekuly óz pikirimen bólisti: «Bıyl koronavırýs pandemııasy álem halqyna tosynnan úlken soqqy jasady. Jer ǵalamsharynda ómir súrip jatqan barlyq adamzat úshin bul úlken qıyndyqqa, qasiretke ákelip soqtyrǵan alapat soǵyspen teń boldy. Qanshama adam ómirimen qoshtasyp, qanshama shańyraqty astan-kesteń etti. Vırýstyń adam tańdamaıtynyn, odan qutylýdyń eń birinshi joly – qatań karantındik erejelerdi saqtaý ekenin uǵyndyq», — dep atap ótti Dosjan Balabekuly.

Ol qala turǵyndary kúndelikti ómirinde betperde rejımin tıisinshe saqtasa, onyń vırýsqa tosqaýyl bolatynyn aıtty.

Sonymen qatar, pandemııaǵa baılanysty azamattardyń qaýipsizdik sharalaryn ustanýǵa baılanysty jaýapkershilikti arttyrý kerektigin atap ótti.

«Qazir Almatyda betperde taǵyp júrgenderdi kez-kelgen jerden kezdestiremiz. Bul – jaýapkershiliktiń basty belgisi. Taqpaıtyndar da, salǵyrt qaraıtyndar da bar. Qoǵam bolǵannan keıin, barlyǵy da oryn alady. Biz betperde taǵyp júrgen qalalyqtardyń beınesi kópke úlgi bolsyn dep birqatar sýretter túsirdik. О́zim túsirgen fotosýretterde karantın jaǵdaıynda ómir súrip jatqan ortanyń búgingi kelbeti kórinis tapqan. Maqsat – oı salý. Biz árqaısysymyz osylaı bir ǵana betperde rejımin saqtaı otyryp, koronavırýs pandemııasyn birge jeńemiz dep oılaımyn. Al baıqaý boıynsha usynǵan sýretterim Almatynyń birqatar jerine ilinipti, baryp tamashalaýǵa bolady», — dedi D. Balabekuly.

Esterińizge sala keteıik, fotokórme 13-19 qarasha aralyǵynda ótýde. Almatylyqtar jibergen fotosýretter men grafıkalyq keskinder iri saýda jáne saýda oıyn-saýyq ortalyqtarynda, halyqqa qyzmet kórsetý ortalyqtarynda ornalastyrylǵan. Sondaı-aq, qalanyń jaryqdıodty ekrandarynan da kórýge bolady.