Almatyda Tuńǵysh Prezıdenti kúnine arnalǵan «Eli súıgen, Elin súıgen Elbasy» atty suqbat kezdesý ótti

30 qarashada Almaty qalasyndaǵy Dostyq úıinde Qazaqstan halqy Assambleıasynyń QR Tuńǵysh Prezıdenti  kúnine arnalǵan «Eli súıgen, Elin súıgen Elbasy» atty suqbat kezdesý ótti.

QHA Tóraǵasynyń orynbasary – Hatshylyq meńgerýshisi Janseıit Túımebaev jıynnyń Qazaqstan halqy Assambleıasynyń 25 jyldyǵy aıasynda ótip otyrǵanyn atap ótti.

«Qazaqstan Respýblıkasynyń Tuńǵysh Prezıdenti kúni – barsha qazaqstandyqtar úshin erekshe mereke.

Tuńǵysh Prezıdent-Elbasy Nursultan Ábishuly Nazarbaevtyń táýelsiz Qazaqstandy quryp, damytýdaǵy qaıratkerlik tulǵasy  men tarıhı mıssııasyn pash etedi. Qazaqstannyń Táýelsiz, zaıyrly otyz jyldyq jańasha tarıhynyń árbir kezeńinde Ult Kóshbasshysynyń saıası qoltańbasy aıqyn kórinedi.

Elbasy Qazaqstan halqyn bir maqsat, bir múdde, bir bolashaq jolyna jumyldyryp, elimizdi ultaralyq kelisim men birliktiń mekeni retinde álemge  tanytty», – dep atap ótti.

Janseıit Qanseıituly Túımebaev bıylǵy Assambleıanyń 25 jyldyǵynyń basty oqıǵasy – Nursultan Nazarbaevtyń tóraǵalyǵymen 11 qarashada ótken Assambleıa Keńesine toqtaldy.

«Elbasy Qazaqstan halqy Assambleıasynyń Tóraǵasy retinde táýelsizdiktiń búkil kezeńindegi birlik pen kelisim saıasatyn saraptap berdi. «Assambleıa azamattyq qoǵamnyń ámbebap qurylymynyń barlyq úzdik sıpattamasyna ıe bolyp, dostyq, beıbitshilik, tynyshtyq pen senim – Qazaqstannyń qoǵamdyq ómiriniń ajyramas bóligine aınalýy úshin mańyzdy úles qosty. Táýelsizdigimizdiń damýy men ulttyń qalyptasýynyń  jolynda dál osylar negizgi alǵyshart boldy» dep atap ótti. «Otbasynyń amandyǵy, birlik, qonaqjaılyq jáne eńbeksúıgishtik, yntymaq pen qurmet, bir-birimizdi qoldaýǵa jáne ózara kómekke daıyn bolý» sııaqty Qazaqstan halqynyń ortaq qundylyqtaryna toqtaldy.

Qoǵamdyq kelisim men birliktiń qazaqstandyq úlgisin odan ary jetildirýdiń strategııalyq baǵyttaryn belgiledi. Tuńǵysh Prezıdent «Otanǵa degen súıispenshiligimizdi únemi qasterlep otyrý, onyń tarıhı taǵdyry úshin ortaq jaýapkershiligimizdi nyǵaıtý» qajettigin tapsyrdy», – dedi ol.

Jıynǵa Elbasynyń janynda júrip, saıası mektebinen ótken, ómirlik tájirıbesinen sabaq alǵan, suqbat qurǵan azamattar, atap aıtar bolsaq: QR Prezıdenti Arhıvi janyndaǵy Qoǵamdyq keńes tóraǵasy,  kóptegen ǵylymı eńbekterdiń avtory Borıs Álikenuly Japarov; QHA Keńesiniń múshesi, Qazaqstannyń Tuńǵysh Prezıdentiniń   2001-2004 jylǵy Baspasóz hatshysy Janaı Seıitjanuly Omarov, «Ahyska» túrik etno-mádenı ortalyǵy» respýblıkalyq  qoǵamdyq birlestiginiń tóraǵasy Zııatdın Ismıhanuly Kasanov; «Almaty aqshamy» gazetiniń bas redaktory, QR Prezıdenti syılyǵynyń ıegeri Qalı Qoshqaruly Sársenbaev; «Ýıǵýravazı» respýblıkalyq qoǵamdyq-saıası gazetiniń bas redaktory, «Qazaqstan uıǵyrlary respýblıkalyq etnomádenı ortalyǵy» qoǵamdyq birlestiginiń múshesi Ershat Mollahýnuly Asmetov qatysty. Jınalǵandar qoǵam ómirinde, jastar arasynda Qazaqstan Respýblıkasy Tuńǵysh Prezıdentiniń memleket qalyptastyrýdaǵy tarıhı rólin aıshyqtaý maqsatynda Elbasymen kezdesken estelikterin bólisip, oı órbitti.

QR Tuńǵysh Prezıdenti kúnine arnalǵan dóńgelek ústelden keıin qatysýshylar «Nursultan Nazarbaev: álemdik aýqymdaǵy saıasatker» atty halyqaralyq onlaın konferensııasyna qosyldy.