Almatyda «Jańa ǵasyr» teatry jańa maýsymnyń shymyldyǵyn túrdi

KSRO Halyq ártisi Asanáli Áshimovtyń jetekshiligindegi «Jańa ǵasyr» teatry jańa maýsymnyń shymyldyǵyn túrdi.  О́ner ujymy kórermen nazaryna Muhtar Áýezovtyń «Qaragóz» dramasyn usyndy. Saltanatty keshte elimizdiń zııaly qaýymy, qazaqstandyq teatr jáne kıno salasynyń úlkeni men kishisi jınaldy. Pák mahabbat pen adaldyqty dáripteıtin qoıylymdy Almaty.tv tilshisi Symbat Noǵaı da tamashalap qaıtty.

Eldegi karantındik ahýalǵa baılanysty aılar boıy jumysyn toqtatýǵa májbúr bolǵan óner ujymy kórermenmen qaıta qaýyshyp otyr. Sahna sańlaqtary tolyqtaı Asanáli Áshimovtyń sheberxanasynda tárbıelengen shákirtter. Ulaǵatty ustaz ózinen ónege alǵan akterlerdiń ónerge jol tartyp, óz kórermenin tapqanyna dán rıza.

«Álderinshe sol barlyq tapsyrmany oryndap shyqty dep oılaımyn. Kórermen qaýymǵa jetip jatsa, sol bizdiń qýanyshymyz, jeńisimiz de sol bolady. Balalardyń repertýary jaqsy», – dedi KSRO Halyq ártisi, teatr jáne kıno akteri Asanáli Áshimov.

«Qaragóz» shyǵarmasy áli kúnge deıin óziniń qundylyǵyn joıǵan joq deıdi akterler. Dramatýrg basty keıipker arqyly sol dáýirdegi qazaq qyzdarynyń basyndaǵy jaǵdaıdy ashyq kórsetken.

Sahnada baǵzy zamandaǵy qazaq halqynyń ómiri, dástúri, dúnıetanymy men ádet-ǵurpy sýretteldi. Oqıǵa súıgenine qosylýdy ańsaǵan jastarǵa rýlyq salt-sana qarsy turyp, basty keıipkerdiń mert bolýymen aıaqtalady.

«Búkil mahabbat shyǵarmalaryn alyp qaraıtyn bolsaq ta, "Qaragóz" óte erek. Bul jerde mahabbattan bólek, dástúr tur, salt tur jáne qazaqılyq tur jáne arada sol 7 ata tur. Sol jeti ataǵa qarsy shyqqan Syrym saldyń oqıǵasy. О́z keıipkerimdi bir jaǵynan aqtap shyǵa alamyn jáne de dattaı alamyn. О́ıtkeni bul keıipker – ózindik shyndyǵy bar keıipker», – dedi «Jańa ǵasyr» teatrynyń akteri Qýanysh Qudaıbergen.

Muhtar Áýezovtiń bir ǵasyrdaı buryn jazylǵan «Qaragóz» pesasy otandyq teatr sahnalarynan áli kúnge deıin túspeı keledi. Kezinde basty keıipkerlerdiń birin somdaǵan akter Azamat Satybaldy óner ujymynyń oıynyna joǵary baǵa berdi.

«Bul spektakldiń ózindik bir ereksheligi kileń jastar oınaıdy. Tazalyq bar sahnada. Shynaıylyq bar. Maǵan óte qatty áser etti. Jalpy bul «Qaragóz» spektaklin qanshama kórdim men bireýiniń jaman shyqqanyn kórgen emespin. Bári jaqsy. Onyń ústine men Narshany oınaǵanmyn Áýezov teatrynda Bolat Atabaev qoıǵan kezde. Qarap otyrdym, qyzyǵyp otyrdym. Narshany jigit óte jaqsy oınaǵan», – dedi  Ǵ. Músirepov atyndaǵy qazaq memlekettik akademııalyq balalar men jasóspirimder teatrynyń dırektory Azamat Satybaldy.

Teatrda karantındik sharalarda nazardan tys qalǵan joq. Kireberisterde qonaqtardyń qyzýy ólshenip, oryndyqtar 2 metr araqashyqtyqta qoıyldy. Zal ishinde bary 50 kórermen otyrdy.