Táýelsizdik kúni qarsańynda «Qazaqstan» Ulttyq telearnasynan «Abaı» jáne «Ál-Farabı» serıaldary efırge shyǵady. Bul týraly búgin «Astana Media Week-2020» aptalyǵynda «Qazaqstan» respýblıkalyq teleradıokorporasııasynyń Basqarma tóraıymy Lázzat Tanysbaı málimdedi.

Pandemııa kezindegi otandyq buqaralyq aqparat quraldarynyń qyzmetin talqylaýǵa arnalǵan alań jumysyna otandyq jáne sheteldik top-menedjerler, jetekshi medıa agenttikterdiń sarapshylary, iri halyqaralyq uıymdar men sheteldik joǵarǵy oqý oryndarynyń ǵalymdary, memlekettik sektor men prodakshn-kompanııalardyń ókilderi qatysýda. 

"Pandemııa Korporasııanyń teleserıaldar óndirisine kedergi bolǵanymen, óndiris tolyqtaı toqtap qalǵan joq. Elimizge indet áli jete qoımaǵan tusta uly Abaıdyń 175 jyldyǵyna arnalǵan «Abaı» serıalynyń, Ál-Farabıdiń 1150 jyldyǵy qarsańynda josparlanǵan «Ál-Farabı» telehıkaıasynyń túsirilim jumystary bastalyp ketken bolatyn. Elimizdiń ár aımaǵynda júrgizilgen túsirilim jumystary tótenshe jaǵdaıǵa baılanysty sál kesheýildedi, dese de, aıaqtap úlgerdik. Qos tarıhı týyndy efırge Táýelsizdik merekesinde shyǵady", - dep atap ótti Basqarma tóraıymy. 

Sonymen qatar, Ulttyq arna egemendiktiń 30 jyldyǵyna arnalǵan 100 bólimnen turatyn «Zamandastar» , Halyq jazýshysy Á.Nurshaıyqovtyń romany jelisi boıynsha túsirilgen «Mahabbat, qyzyq mol jyldar» telehıkaıalaryn usynbaq. 

Lázzat Tanysbaı osy rette «Qazaqstan» teleradıokorporasııasy túsirgen otandyq fılmderge sheteldik naryqtan qyzyǵýshylyq joǵary ekenin jetkizdi.  

Bıyl «Qazaqstan» jáne «Balapan» telearnasynyń serıaldary AQSh, Latyn Amerıkasy elderinde aǵylshyn, ıspan jáne portýgal tilderinde kórsetilmek. Kelisimshart AQSh-tyń jelilik jáne spýtnıktik habar taratý qyzmetin júzege asyratyn «Olympusat» kompanııasymen jasalǵan. Satylǵan ónimder tiziminde «Ǵazız júrek», «Oralý», «Qashqyn», «Jańǵyryq», «47 balanyń anasy», «Shyraǵym» telehıkaıalary men «Balapan» telearnasynyń «Tynymsyz shójeler», «Sábı», «Erkeler», «Shahmat patshalyǵy», «Pyraqtar» anımasııalyq jobalary bar. 

Odan bólek, jalpy sany 242 bólimnen turatyn serıal men anımasııalyq joba TMD-daǵy eń úzdik onlaın-kınoteatr sanalatyn IVI.RU platformasy arqyly taralmaq.  

«Qazaqstan» arnasy telekórermenge bıylǵy jyly jalpy sany 300-ge jýyq serııadan turatyn 13 otandyq telehıkaıa usynady.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir