Almatyda teatrlar jumysyna ruqsat berildi

Almatyda teatrlardyń jumysyna ruqsat berildi. Bul týraly Almaty qalasynyń bas memlekettik sanıtarlyq dárigeriniń qaýlysynda aıtylǵan.

Qaýlyǵa sáıkes, teatrlarda otyrý oryndarynyń tolýy 50% aspaýy tıis.

10 qarashadan bastap infokazakhstan.kz portalyna tirkelý arqyly jumys isteýge ruqsat etiledi.

«Mádenı nysandarda áleýmettik araqashyqtyq saqtalýy mindetti. Sondaı-aq, sanıtarlyq-dezınfeksııalyq rejım, jeldetý jáne aýany baptaý júıeleri úzdiksiz jumys istep turýy kerek. Oǵan qosa, aýany sáýlelendirý (kvars) usynylady»,– delingen Almaty qalasynyń bas memlekettik sanıtarlyq dárigeri Jandarbek Bekshınniń koronavırýs ınfeksııasyn aldyn-alý jónindegi jańa qaýlysynda.

Sondaı-aq, 10 qarashadan bastap kúsheıtilgen sanıtarlyq-dezınfeksııalyq rejımdi saqtaı otyryp, dinı obektilerdiń qyzmetine ruqsat berildi.