"Vaksına egý josparlanyp otyr". Toqaev Mamınge tapsyrma berdi

Memleket basshysy premer-mınıstr Asqar Mamındi qabyldady. Bul týraly Aqorda saıty habarlady.

Saıt málimetinshe, Mamın prezıdentke koronavırýs indetine qarsy otandyq vaksınanyń ázirlený barysy týraly baıandady.

Premer-mınıstr prezıdentke 29 qarasha kúni klınıkalyq synaqtardyń 1 jáne 2-kezeńderiniń aıaqtalǵany týraly málimdedi. Asqar Mamınniń aıtýynsha, vaksınanyń keri áseri anyqtalǵan joq jáne onyń joǵary tıimdiligi tirkeldi. 25 jeltoqsannan bastap klınıkalyq synaqtardyń 3-shi kezeńinde atalǵan vaksına 3 myń eriktige egiledi. Synaqtar tolyǵymen 2021 jyly naýryzdyń sońyna qaraı aıaqtalady.  

Sonymen qatar memleket basshysyna osy jyldyń sońyna deıin 2 mıllıon mólsher kólemindegi otandyq vaksınanyń alǵashqy partııasy shyǵarylatyny týraly aqparat berildi.

Memleket basshysynyń Reseı prezıdenti Vladımır Pýtınmen jasaǵan kelisimine sáıkes osy jyldyń 22 jeltoqsanynan bastap Qazaqstanda reseılik "Spýtnık V" vaksınasyn óndirý qolǵa alynady. 2021 jyldan bastap turǵyndarǵa erikti túrde jappaı vaksına egý josparlanyp otyr. Alǵashqy kezeńde turǵyndardyń aýrýdy juqtyrý qaýpi joǵary toby, ıaǵnı dárigerler, pedagogtar, kúshtik qurylymdardyń qyzmetkerleri qamtylady.  

Qasym-Jomart Toqaev Asqar Mamınge otandyq vaksına óndirisine qatysty berilgen tapsyrmany jedel oryndaǵany úshin alǵys bildirip, dáriniń tıimdiligine basa mán berýdi jáne turǵyndarǵa qol jetimdi bolýyn baqylaýda ustaýdy tapsyrdy.