Toqaev Ulttyq bank tóraǵasyna tapsyrma berdi

Prezıdent Qasym-Jomart Toqaev Ulttyq bank tóraǵasy Erbolat Dosaevty qabyldady, dep habarlady Aqorda saıty.

Ulttyq bank tóraǵasy Qasym-Jomart Toqaevqa bıylǵy 11 aıdaǵy aqsha-nesıe saıasatyn júzege asyrýdyń aldyn ala qorytyndylary, álemdik qarjy naryqtarynyń qazirgi ahýaly men olardy qalpyna keltirýdiń perspektıvalary týraly baıandady.

Sonymen qatar ol 2025 jylǵa deıingi ulttyq tólem júıesin damytý baǵdarlamasyn iske asyrý boıynsha qabyldanǵan sharalar týraly aıtty.

Dosaev prezıdentke zeınetaqy aktıvteriniń jaǵdaıy týraly esep berip, memlekettik qaryzdy basqarýdyń tıimdiligin arttyrý jóninde usynystar aıtty.

Sondaı-aq memleket basshysyna orta merzimdi kezeńde ulttyq bankti jáne qarjy sektoryn sıfrlandyrýdyń negizgi baǵyttary týraly aqparat berdi.

Toqaev kezdesý sońynda Erbolat Dosaevqa birqatar naqty tapsyrma berdi.