Nurymbetov: Jalaqyny arttyrý qarastyrylady

Múgedek adamdarǵa beriletin járdemaqylar qaıta qaralatyn bolady. Bul týraly úkimet otyrysynda eńbek jáne halyqty áleýmettik qorǵaý mınıstri Birjan Nurymbetov habarlady.

Mınıstrdiń aıtýynsha, úkimet tarapynan áleýmettik qyzmetkerlerdiń jalaqysyn arttyrý máselesi qarastyrylyp jatyr.

– Áleýmettik jumysta áleýmettik qyzmetkerlerge negizgi ról beriledi. Osyǵan baılanysty IýNISEF pen elbasy qorynyń qoldaýymen búginde 12 myń áleýmettik qyzmetkerdi testileý jáne oqytý bastaldy. Úkimet tarapynan áleýmettik qyzmetkerlerdiń jalaqysyn kezeń-kezeńmen arttyrý máselesi qarastyrylýda. Jańa áleýmettik kodekste áleýmettik qyzmetkerlerdiń mártebesin arttyrýǵa baǵyttalǵan normalar jeke aıqyndalatyn bolady, – dedi Nurymbetov.

Mınıstr múgedek adamdardy áleýmettik qorǵaý máselesi boıynsha zań jobasyndaǵy tolyqtyrýlardy atap aıtty.

– Ulttyq jospar sheńberinde mınıstrlik azamattardyń jekelegen sanattaryn áleýmettik qorǵaý máselesi boıynsha zań jobasyn ázirledi. Zań jobasy 80-nen astam normatıvtik-quqyqtyq aktige ózgerister engizýdi kózdeıdi. Múgedektigi bar adamdardyń quqyqtary men áleýmettik qoldaýdy qamtamasyz etýge qatysty Nur Otan partııasynyń saılaýaldy tuǵyrnamasynda kórinis tapqan onnan astam tujyrymdamalyq tolyqtyrýlardy qamtıdy.

Onyń ishinde:

– múgedek adamdardy jumysqa ornalastyrý jónindegi kvotany oryndamaıtyn jumys berýshilerdiń ótemaqy jarnalaryn engizý;

– barlyq birinshi toptaǵy múgedek jandarǵa kútim jasaıtyn adamdarǵa járdemaqy engizý;

– 7 jastan 16 jasqa deıingi balalardy múgedek toptary boıynsha bólý, járdemaqy mólsherin qaıta qaraý;

– múgedektikti jáne asyraýshysynan aıyrylý boıynsha járdemaqylardy birge alý quqyǵyn berý;

– I-II top múgedektigi belgilengen jaǵdaıda 18 jastan asqan balalar úshin turǵyn úı kezegin saqtap qalý sııaqty mańyzdy áleýmettik normalar bar. Zań jobasy barlyq satylardan ótti  jáne jaqyn arada parlamentke engiziletin bolady, – dedi mınıstr úkimet otyrysynda.