"Túrki áleminiń abyzy". Nazarbaevqa aıtylǵan maqtaý sózder

26 qarasha kúni "QR Tuńǵysh prezıdenti: jasampazdyq pen údemeli damýdyń 30 jyly" atty halyqaralyq konferensııada Nursultan Nazarbaevtyń tarapyna maqtaý sózder kóp aıtyldy,  solardy toptastyryp kóreıik.

Qytaıdyń búkilqytaılyq halyq ókilderi jınalysy turaqty komıtetiniń tóraǵasy Lı Chjanshý:

– Tuńǵysh prezıdent Nazarbaev – halyqaralyq qoǵamdastyqtaǵy bedeldi saıasatker bolýmen qatar, qytaı halqynyń tileýles dosy retinde uzaq ýaqyttan beri qytaılyq-qazaqstandyq tatý kórshilik jáne dostyq yntymaqtastyqty nyǵaıtyp, Qytaıda joǵary bedelge ıe bolyp keledi.

Aqparat jáne qoǵamdyq damý mınıstri Aıda Balaeva:

– Rasynda da qazaq degen ultty álemge tanytyp, Qazaqstan degen eldi dúnıe tórine ozdyrǵan Elbasynyń osy parasatty eńbegi, salıqaly saıasaty. Sodan bolar, bul mereke bir tulǵa emes, tutas ulttyń, táýelsiz jurttyń ortaq qýanyshy dep nyq senimmen aıta alamyz.

QR Tuńǵysh syrtqy ister mınıstri Tóleýtaı Súleımenov:

– Nursultan Ábishuly saıası kóregendigimen eldiń bolashaǵy úshin jańa ustanymdy daıarlaı aldy. Degenmen oǵan jetý ońaı maqsat bolmady. Sol kezeńde eske alsaq, bul óz kezeginde elimizdiń damýynyń traektorııasyn aıqyndaǵan eń mańyzdy tarıhı kezeń boldy.

Tórt fılmde Elbasynyń rólin somdaǵan akter, májilis depýtaty Nurlan Álimjan:

– "Rýhanı jańǵyrýdy" qarap, Elbasynyń úlken saıasatyn, eńbegin kórip otyrmyz. Qaı jerge barsaq ta, tuńǵysh prezıdenttiń aty atalady. Elbasy – ol álem moıyndaǵan saıasatker, búkil túrki áleminiń abyzy. Álem elderine barǵan kezde Elbasyny kórgen árbir adam tek qana jaqsy pikirlerin aıtyp jatqanyn baıqadyq.

Túrkııa ulttyq jınalysynyń tóraǵasy Mýstafa Shentop:

– Qazaqstannyń údemeli damýynda Elbasy Nursultan Nazarbaevtyń demokratııany, adam quqyqtaryn jáne Zań ústemdigin damytý jolynda qabyldaǵan qadamdary mańyzdy oryn alatyny sózsiz. Nursultan Nazarbaev – jol bastaýshy jáne danalyqqa ıe tulǵa. Sondyqtan onyń qundy kózqarastaryn búkil álem qoldanýy kerek.