Almatydaǵy Tóle bı jáne Áýezov kósheleriniń qıylysyndaǵy "Sulpak" saýda úıiniń aldyndaǵy aǵashtardy kesý oqıǵasyna baılanysty kompanııa resmı málimdeme jasady.
 
"Sulpak" kompanııasy taratqan málimdemede brend sońǵy kúnderi qoǵam tarapynan úlken qysymǵa alynǵany, kompanııa áleýmettik jaýapkershilikti sezinetin mekeme retinde Almaty úshin alańdaıtyny atap ótilgen.
 
"Tergeý barysynda merdiger qyzmetkerleri óz betimen aýmaqtaǵy aǵashtardy keskeni belgili boldy. Bul aýmaq Sulpak kompanııasyna tıesili emes, kompanııa aýmaqty jalǵa alyp otyrǵan joq. Salalyq organdar kinálilerge qatysty zań sheńberinde tıisti shara qoldanatynyna senimdimiz. Biz turǵyndar men klıentterimizdiń sezimin túsinemiz ári qýattaımyz. Qalamyzdyń ekologııasyn jaqsartý jolynda ákimshilikpen yntymaqtasa jumys isteýge ázirmiz. Kompanııa basshylyǵy qala ákimdigimen kelise otyryp belgilengen aýmaqqa 500 úlken aǵash egý týraly sheshim qabyldady" delingen aqparattyq habarlamada.
 
23 qarashaǵa qaraǵan túni "Sulpak" saýda úıi mańynda 13 aǵash zańsyz kesilgen. Másele áleýmettik jelide qyzý talqylanyp, daýǵa prezıdent nazar aýdarǵan. Kinálilerdi taýyp, tıisti shara qoldaný qajettigin aıtqan.
 
Artynsha Almaty qalasy ákimdigi men qalanyń quqyq qorǵaý organdarynyń ókilderi kesilgen aǵashtardyń ishinde toǵyzy emen, ekeýi qaraǵash jáne eki akasııa aǵashy baryn, ákimdikke kásipkerler tarapynan aǵash kesýge ótinish túspegenin málim etti.
 
Uzamaı emender sırek kezdesetin aǵash retinde Qazaqstannyń Qyzyl kitabyna engeni anyqtalyp, qylmystyq kodeksiniń 2-bóliminiń "Sırek kezdesetin jáne quryp ketý qaýpi tóngen, sondaı-aq ósimdikter men janýarlardyń túrlerin, olardyń bólikterin nemese týyndylaryn paıdalanýǵa tyıym salynǵan zańsyz aınalym" 339-babyna sáıkes qylmystyq is qozǵaldy.
 
Keltirilgen shyǵynnyń mólsheri anyqtalǵannan keıin, Almatynyń Jasyl ekonomıka basqarmasy kesilgen aǵashtardyń ornyna óteme otyrǵyzýdy talap etetinin, jańa úlgidegi erejeler boıynsha seriktestik 260 aǵash otyrǵyzyp, olardy eki jyl boıy kútip-baptaýy kerektigin habarlady.
 
Sonymen qatar 1 jeltoqsanynan bastap jasyl ekonomıka basqarmasy jasyl jelekterdi kesýmen aınalysatyn kompanııalardyń reıtıngin jarııalamaq.
"Qamshy" silteıdi
Ilmek sózder: zańsyz aǵash kesý

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir